ئەمریكا ب توندی رەت دكەت کو گرۆپێن چەكدار د حوكمەتا نوو یا ئیراقێ دا پشكدار بن
ئەمریكا پەیامەكا نوو و هوشدارییەك دایە حوكمەتا بهێت یا ئیراقێ، تێدا ب توندی رەت دكەت كو رێك بهێتە دان گرۆپێن چەكدار یێن ژ یاسایێ دەركەفتی چو رۆل و پشكداری د ناڤ كابینەیا نوو یا حكومەتێ دا هەبیت.
تۆڕا نووچەیان یا «ئێن بی سی نیوز»، ژ دەڤێ بەرپرسەكێ بلندێ وەزارەتا دەرڤە یا ئەمریكا بەلاڤكریە»نوكە هێلا جوداكەر د ناڤبەرا دەزگەهێن دەولەتا ئیراقێ و گرۆپێن چەكدار دا یێن ژ یاسایێ دەركەفتی گەلەك ‹نەدیار و تارییە›».
هەروەسا ئەو بەرپرسێ ئەمریكی داخوازێ ژ عەلی ئەلزەیدی دكەت، د كابینەیا نوو یا حوكمەتا خوە دا، پەیوەندیێن خوە د گەل گرۆپێن چەكدار ببڕیت.
د پشكەكا دی یا ئاخفتنێن خوە دا، وی بەرپرسێ ئەمریكی جارەكا دی داخواز ژ حوكمەتا بهێت یا ئیراقێ كر كو بەیاننامەیەكا رۆهن و ئاشكرا بەلاڤ بكەت و تێدا دوپات بكەت كو گرۆپێن چەكدار ب چو رەنگەكی پشكەك نینن ژ حوكمەتێ.
ئەڤ داخوازێن ئەمریكا پشتی زنجیرەیەكا ئالۆزیێن ئەمنی ل دەڤەرێ دهێن، وەك چەوا وی بەرپرسی ئاماژە پێ دای و دوپاتی ل سەر كری كو «دەزگەه و بەرژەوەندیێن ئەمریكا ل ئیراقێ بەرەڤ رووی پتر ژ 600 هێرشان بووینە د دەمێ وی هەڤڕكییا سەربازی دا یا كو دەڤەرێ ب خوە ڤە دیتی ژ دوماهییا مەها شواتێ هەتا دەمێ چوونا د بیاڤێ بجهئینانێ یا ئاگربەستێ دا ل هەشتی مەها نیسانا بۆری.»
چەمكێ «گرۆپێن چەكدار یێن ژ یاسایێ دەركەفتی» ل ئیراقێ بۆ وان گرۆپ و میلیشیایان دهێتە بكارئینان كو سەرەڕای هندێ كو هندەك ژ وان ب فەرمی پشكەكا دەزگەهێن ئەمنی نە، لێ ل دەرڤەی فەرمانا سەرۆك وەزیران و فەرماندێ گشتی یێ هێزێن چەكدار كار دكەن. ئەڤ گرۆپە ل سالا 2026ێ بووینە ئاستەنگەكا مەزن بۆ ئارامییا ئیراقێ و پەیوەندیێن نێڤدەولەتی.
واشنتۆنێ د دەمێ بۆری دا چەندین جاران داخواز ژ حوكمەتا ئیراقێ كربوو كو دەستبجهـ ئەڤان گرۆپان هەلوەشینیت و هوشداری دابوو كو هەكە نەهێنە كۆنترۆلكرن، ئیراق دێ بەرەڤ رووی سزایێن توند بیت.
