سەعید خەلیل: كچێن دهۆكێ مفا ژ قارەمانییا نێڤدەولەتی وەرگرت
د داخویانیەكێ دا سەعید خەلیل ئەندامێ فدراسیۆنا یارییا تێنسا ئەردی ل ئیراقێ پشكدارییا كچێن دهۆكێ ب ناڤێ هەلبژارتییێ ئیراقێ د كۆپا بێلی چین كینگ یا نێڤدەولەتی دا ب باشی و مفادار خویاكر، پشتی یاری بەرانبەر هەلبژارتییێن فێتنام، تاچاكستان و توركمانستانێ كرین، ئەوا هەڤڕكیێن وێ ل وەلاتێ فێتنامێ هاتینە كرن.
زێدەتر ناڤهاتی گۆت: هەر سێ كچێن پارێزگەهێ و یانەیا دهۆك لارا ئاڤدەل، زەلال سەعید و هانا ئاڤدەل ل گەل ڕاهێنەرێ خوە ئاڤدەل حەسەن ب ناڤێ هەلبژارتیێ ئیراقێ پشكدارییەكا باش و مفادار د قارەمانییا كۆپا بێلی چین كینگ یا نێڤدەولەتی دا كر سەرەرایی ئەنجامێن لاواز و نە گەهشتن بۆ قووناغا دویێ، پێنەڤێت مەرەما مە یا سەرەكی ئەو بوویە كچێ نمە پشكداریێ بكەن بۆ وەرگرتنا مفایی و شارەزاهییێ خوە بەرهەڤكرن بۆ هەڤڕكیێن ڤاڤارتنێن ئاسیا و پلێتا مۆندیالا جیهانی، ئەوا مە دیتی ئاستێ یاریزانێن مە گەلەك باش بوویە و جهێ دلخوەشییێ یە، تایبەت لایەنێ هونەری و جەستەیی كو پێشكەفتنەكا باشتر ژ وەرزێن بۆری دیار بوویە.
ژلایەكێ دووڤە سەعید خەلیل گۆت: هەڤڕكیێن قارەمانییێ بهێز بوون و پرانییا یاریزانێن پیشەكار ل سەر ئاستێ ئاسیا پشكداربوون و وەلاتێن رۆژهەلاتا ئاسیا ب ئاست و شیانێن باش هەنە لەوما ژی ئەو پێشكەفتی تر بوون تایبەت لایەنێ پشتەڤانیێ، لێ یاریزانێن مە لارا و خویشكا وێ هانا ئاڤدەل و هەڤالا وان زەلال سەعید شیان ببنە هەڤڕكێن بهێز و جهێ دەستخوەشییا هەموو بەرهەڤبوونا.
