ستێرەكا دی یا گـەش ل ئەسمانێ ئـەدەبـێ كـوردی ئـاڤـابوو

زوهێر كورەماركی

كەسایەتیێ بەرچاڤێ باژێرێ دهۆكێ نڤێسەر و هەلبەستڤانێ خودان شیان (خورشید ئەحمد پیرۆمەری) وەغەرا داویێ كر، هەڤال و برا و خال خورشید نەبەس رەوشەنبیر و نڤێسەرو هەلبەستڤانەك بوو، بەلكو كەسایەتیەكێ مەزنێ باژێرێ دهۆكێ بوو، ئێك ژ ستوونێن گرۆپێ مە یێ فەلەك یێ رەوشەنبیری و جڤاكی بوو، كو ڤی گرۆپی ب رەنگەكێ خۆبەخش چەندین بزاڤێن رەوشەنبیری و جڤاكی ئەنجامداینە. خال خورشید خودانێ دلەكێ مەزن و سپی بوو، گەلەك خزمەتا ئەدەب و كولتوورێ كوردی یا كری ب هەلبەست و نڤێسینێن خۆ و ب ئاڤاكرنا كەسایەتیا خۆ وەك مرۆڤ دۆستەك و خێرخوازەك و چالاكڤانەكێ جڤاكی شییا خۆ بكەتە كەسایەتیەكێ بەرچاڤێ جڤاكێ د ناڤ مەزنان مەزن بوو و د ناڤ بچووكان دا ژی بچووك بوو، د ناڤ گەنجان دا ژی دا گەنج بوو مەردەمێر بوو و نوكتەچییەكێ خوش بوو، هەردەم دڤیا گرنژین و كەنی ل كۆمبوون و جڤاتان بێخیتە سەر لێڤێن هەڤالان. ب هزر و پێنڤیسێ خۆ شییا گەلەك پەیڤێن كوردی یێن رەسەن و كەڤن ژ مرنێ قورتال بكەت ب تایبەتێ پەیڤێن بەرزە و كێم هاتینە بكارئینان كو ئەو شییا وان پەیڤان ئەكتیف بكەت و د هەلبەستێن خۆ دا نووبكەتە ڤە، هەروەسا مینا فەرهەنگەكێ بوو مە هەمی گاڤان پرسیار پەیڤێن كەڤن و ئالاڤێن كولتووری ژێ دكرن مینا جەنجەر و شالۆك و سێگۆهك و پشمە و لەوەندی …هتد.
چوونا وی خۆسارەتەك بوو ل ئەدەب و كولتوور و زمانێ كوردی، چونكی گەلەك تشت ل بەر دەست بوون وەكی ئەز پێ هایدەر، دڤیا چاپ بكەت و پەرتووكخانا كوردی پێ دەولەمەند بكەت.
گەلەك پەیڤێن وی یێن جوان د ناڤ مە هەڤالان دا ببوونە تڕێند مینا پەیڤا (خالی) پەیڤا (هەلەباب).. رێكا تە ب گول بیت گۆڕا تە ب نۆر بیت، تو چەند خودان دلەك پاقژ و بێ كەرب و كین بووی؟ دلێ تە یێ مەزن بەس حەژێكرن و ڤیان و دۆستینی و هەڤالینی تێدابوو، تە ئەم هەمی فێری تشتێن جوان و پاقژ دكرین، تو فەرهەنگا مە بووی ئەم ژ تە فێری گەلەك دەرگەهێن ژیانێ‌ و ئەتەكێتێن وێ دبووین تو جڤاكناس و رەوشەنبیرەكێ بێ بەڤل بووی، خالێ رەحمەتی چەندین پەرتووك و نامیلكە چاپكرینە و هندەكێن دی كار تێدا دكر، لێ قەدەرێ رێ نەدایێ. وەغەرا وی دهۆك و هەڤال و برادەرێن وی هەمی رەشپۆش و خەمگین كرن و كەلێنەكا مەزن د ناڤ لاپەرێن ئەدەب و كولتوورێ كوردی دا هێلا.

کۆمێنتا تە