كەمان هەڤالەكا هێژایە ڕۆژانە یا ل گەل من
بێوار حەمدی
مۆزیكژەن (دلبرین نەزیر) كو ژەنیارێ ئامیرێ كەمانێ یە، د دیدارەكێ دا گۆت: حەزژێكرنا من بۆ مۆزیكێ بۆ بەری چەندین سالان دزڤڕیت و نوكە كەمان ل گەل من نە بەس وەكو پارچەیەكا داری یە، بەلكو هەڤالەكا هێژایە رۆژانە یا ل گەل من و خۆشیێ ژ ژەنینا وێ دبینم.
هەروەسا گۆت: پێدڤیە ئەم شانازیێ ب مۆزیكا كوردی، ب تایبەت ژی یا فۆلكلۆری بكەین، چنكو ناسنامە و مێژوویا مە یا كەڤنارە، ژبەر هندێ فەرە هەر مۆزیكژەنەكێ كورد شانازیێ پێ ببەت و نەتەوەیێن مەزن ل جیهانێ هەموو دەمان شانازیێ ب مۆزیكا خۆ دبەن، ژبەر هندێ نەمر دمینن، سەیارەت ژیریا چێكری ژی بۆ كارێن مۆزیكی لایەنێن خۆ یێن ئەرێنی و نەرێنی هەنە، لێ ب دیتنا من چ جاران نەشێت ڕۆلێ هەست و گەرمێ و پەیوەندیا روحی یا مۆزیكژەنی ل گەل ئامیرێ وی بگێڕیت.
