45 جۆرێن مرەبایێ چێدكەت
سندس سالح سلێڤانەیی
نافیا محەمەد موراد، خانمەكا خەلكا رۆژئاڤایێ كوردستانێ یە، بۆ دەمێ چەند سالانە ل كەمپەكا سەر پارێزگەها دهۆكێ ڤە دژیت و بەری پێنج سالان پرۆژەیەكێ بچووك ڤەكریە، ئەوژی دانانا كارگەهەكا بچووك یا چێكرنا مرەبایێ و نوكە (45) جۆرێن مرەبا خۆمالی ل كارگەها وێ دهێتە چێكرن و ب گۆتنا وێ ئەو هندەك جاران خۆلان ڤەدكەت و هەتا نوكە (250) كچ و ژن ل بەر دەستێ وێ فێری چێكرنا مرەبایێ بووینە.
نافیا دبێژیت: دەمێ ژ نەچاری مە رۆژئاڤایێ كوردستانێ بجه هێلای و هاتین ل دهۆكێ ئاكنجی بووین، كو ئەم ب مالا خۆ یا دویێ دبینن، پشتی دەمەكی من هزر دوێ چەندێ دا كر كو ئەم ژی كارەكی بۆ خۆ بكەین، ئەو ژی ژبەر دو ئەگەران، یا ئێكێ دا بێكار نەمینین، یا دویێ ژی كو ئەو ژی گەلەكا گرنگە دا هاریكاریا هەڤژینێ خۆ بكەین دڕێڤەبرنا مالێ دا و ب پشتەڤانیا وی من ئەڤ كارگەهە ڤەكر و نوكە دو كچ ژی ل دەف من كاردكەن و ئەم (45) جۆرێن مرەبایێ كو هەموو ژ فێقیێ سروشتی نە چێدكەین و خواست ل سەر هەموو جۆران یا هەی و هیڤیا من ئەوە ڕۆژەك بهێت ئەم كارگەها خۆ مەزنتر و بەرفرەهتر لێ بكەین، دا بشێن پتر دەلیڤەیێن كاری بۆ كچ و ژنان ببینین.
