زاخۆ دێربییا كوردستانێ د بەرژوەندییا خوە دا بدووماهی ئینا و جەماوەرێ خوە ئاشكر
ب دووماهی هاتنا یاریێن گەڕا 12 ژ هەڤڕكییێن خولا ستێرێن ئیراقێ یا فوتبۆلێ یانەیا دهۆكێ مەزنترین سەركەڤتن ئینا و زاخۆ دێربییێ كوردستانێ ئێكلاكرن و شەڕێ سەرێ لیستێ دناڤبەرا سێ یانەیان بەردەوامە
ئەلهۆیێن چیا بلند فڕین
تیما یانەیا دهۆكێ ئەلهۆیێن چیا سەركەفتنەكا دیرۆكی تۆماركر پشتی دناڤ ئەرد و جەماوەرێ خوە دا ب پێنج گۆلان بەرانبەر دو گۆلان شیایی مێڤانا خوە یانەیا كەرەبەلا خوسارەت بكەت، د یارییا واندا ئەوا ل ئەینییا بۆری ب بەرهەڤبوونا مەسرۆر بارزانی سەرۆكێ حوكمەتێ و سەربەست لەزگین بەرپرسێ ڕێكخستنا پارتی ل بەهدینان كو تیما دهۆكێ دیارییەكا جوان پێشكێشی مێڤانێن خوە كر، هەر پێنج گۆلێن دهۆكییان ژلایێ یاریزانان، یونس حەمود دو گۆل، كارزان غازی، بەیار ئەبوبەكر و مەحمود ئەلمواس، بڤێ ئەنجامی ئەلهۆیێن چیا پێشڤە هاتە ڕێزا هەشتێ ب كۆمكرنا 15 خالان ژ سێ سەركەفتن، شەش وەكهەڤی و دو خوسارەتیان، 19 گۆل هەنە و 15 گۆل ل سەر هاتینە تۆماركرن، ژلایێ خوەڤە یانەیا كەربەلا ب شەش خالان ل ڕێزا 20ێ و دووماهییێ یە.
سلێمان ڕەمەزان دەستخوەشییا جەماوەری و یاریزانان كر
د پرێسكونفرانسێ رۆژنامەڤانی دا سلێمان ڕەمەزان ڕاهێنەرێ نوو یێ یانەیا دهۆكێ گۆت: پیرۆزباهییێ ل پشتەڤانێن یانەیا دهۆكێ و كارگێری و یاریزانان دكەم بۆ ئەڤێ سەركەڤتنا گرنگ و مەزن، پێنەڤێت ئەڤ ئەنجامە دێ بیتە پالدەر تیما مە بەردەوامبیت ل سەر ئاستێ خوە یێ باش، دەستخوەشییێ ل جەماوەرێ تیمێ دكەم كو بەردەوام پشتەڤانێن یانەیا خوەنە بۆ من كەیفخوەشیا وان ژ سەركەفتنێ خۆشترە، هەروەسان دەستخوەشییا یاریزانان دكەم كو ب مۆرالەكا بلند شەڕی بۆ سەركەڤتنێ كرن، ب هیڤی نە بۆ یاریێن بهێت ژی تیما مە بەردەوامبیت ل سەر ئاستێ خوە یێ باش، كاروانێ تیمێ یێ درێژە، تیما مە ب ستێرێن خۆدان شیانن و یا مەزنە و هەڤڕكە بۆ ڕێزبەندیێن پێشیێ، بۆ یاریێن بهێت دێ هەموو بزاڤان كەین ئەو خالێن یاریێن بۆری ژ دەستداین قەرەبوو بكەین.
د. عەبدوللا جەلال سۆپاسییا سەرۆكێ حكومەتێ دكەت
ژلایێ خوەڤە د. عەبدوللا جەلال سۆپاسییا مەسرۆر بارزانی سەرۆكێ حوكمەتا هەرێما كوردستانێ كر و گۆت: سۆپاس بۆ جەنابێ تە كو ئەڤرۆ تە یاریگەها مە ب هاتنا خوە خەملاندی و تە بیرهاتنێن خۆش ل مە دوبارە كرنە ڤە، سۆزێ د دەینە جەنابێ تە ل جهێ وێ باوەریێ بین یا تە ب مە دایی، پرۆژەیێن مەزن ل پێشبییا مە نە.
ب ناڤێ كارگێرییا یانەیا دهۆكێ و پشتەڤانێن وێ سۆپاسییا جەنابێ تە دكەین بۆ وێ پشتەڤانییا بەردەوام، دێ كار كەین ژبۆ بلند ڕاگرتنا ناڤێ كوردستانێ ل هەمی مەیدانا، پیرۆزە ئەڤ سەركەفتنا گرنگ و سێ خالێن یاریێ ل هەمی حەژێكەر و پشتەڤانێن ئەلهۆیێن چیا.
زاخۆ گرێیا سەركەڤتنان ڤەكر
تیما یانەیا زاخۆ كوڕێن خابۆری دناڤ ئەرد و جەماوەرێ خوە دا گرێیا سەركەڤتنا د دێربییێ كوردستانێ دا ڤەكر و شیا گرنژینێ بێخیتە ل سەر دێمێ پشتەڤانێن خوە ئەوێن پێشتر توورەبووین، ب سەركەفتن ل سەر مێڤانا خوە یانەیا هەولێر ب 2-1 گۆلان، هەردو گۆلێن زاخۆلیان ژلایێ یاریزانێن وێ زیاد ئەحمەد و یێ ئۆزپاكستانی شیرۆزوڤ دیمیترۆڤ و شیان زنجیرەیا ئەنجامێن خراب ب ڕاوەستینێن ئەوێن د گەڕێن پێشتر دا سێ خوسارەتیێن ل دووڤ ئێك تۆماركرین، خالێن خوە گەهاندە یا 12ێ و پێشڤە هاتە ڕێزا 14ێ ب سێ سەركەفتنان و سێ وەكهەڤییان، دبەرانبەر دا پێنج خوسارەتی هەنە، بتنێ هەشت كرینە لێ 15 گۆل ل سەر هاتینە تۆماركرن، ژلایێ خوەڤە یانەیا پایتەختێ كوردستانێ هەولێر جهێ خوە ل رێزا پێنجێ پاراست ب كۆمكرنا 18 خالان ژ پێنج سەركەفتن، سێ وەكهەڤی و سێ خوسارەتیان، 1413 كۆل تۆماركرینە و شەش گۆل ل سەر هاتینە تۆماركرن.
ڕاهێنەرێ زاخۆ كەیفخوەشە
د پرێسكونفرانس دا یێ قەتەری تەلال ئەلبلۆشی كەیفخوەشییا خوە دیاركر ب سەركەفتنێ و گۆت: ئەنجامێ ڤێ یاریێ بۆ مە گەلەك گرنگ بوو و بەلانسێ تیمێ ڤەگەڕاندنە هەڤڕكییان، نە ژبەركو مە سەركەفتن ل سەر یانەیا هەولێر ئینا بەلكو ژبەر ئەنجامێن مە یێن لاواز د یاریێن بۆری دا تایبەت د سێ یاریێ بۆری دا تووشی خوسارەتییان بوو، ئەڤەژی بێ ئۆمێدیەك و نەڕازیبوونەك دناڤبەرا پشتەڤانان دا پەیدابوو و ئەڤە ژی مافێ وان بوویە، لێ پشتەڤانییا بەردەوام یا بەرپرسێن ئیدارەیا سەربەخوەیا زاخۆ بۆ یانەیێ وەكر هێزەكا باشتر بكەڤیتە دناڤ تیمێ دا، ئەم ژ هەژی سەركەڤتنێ بوووین، دڤێت ل سەر ڤێ شێوازی بەردەوامبیت و پلانێن مە بۆ سەركەڤتنێ نە ڕاوەستییێن.
حەفتییا بهێت بۆ دهۆكییان ئاگرینە و زاخۆ دێ چیتە میسان
فدراسیۆنا فوتبۆلا ئیراقێ یاریێن گەڕا 12ێ ژ خولا ستێرێن ئیراقێ ڕاگەهاند، یانەیا دهۆك دێ بەر ب باژێرێ فەلوجە چیت و دبیتە مێڤانا یانەیا ئەلگەرمە خودانا سەرێ لیستێ د یاریەكا ئاگرین دا ئەوا دێ ل ئەینییا بهێت ل دەمژمێر پێنجی ئێڤاری ل یاریگەها ئەلجولان هێتە كرن، ژلایێ خوەڤە یانەیا زاخۆ ل شەمبییا بهێت ل باژێرێ میسان بیت و یارییا خوە یا ڤێ گەڕێ بیتە مێڤانا یانەیا نەفت میسان ئەوا دێ ل دەمژمێر 4:30 ئێڤاری ل یاریگەها میسان هێتە كرن.
چار یاریێن مایی یێن هەردو یانەیێن دەڤەرا بەهدینان د خولێ دا
یاریێن یانەیا دهۆكێ بڤی شێوەیی نە
گەڕا 13ێ، مووسل- دهۆك، یاریگەها زاخۆ 5- 11- 2026.
گەڕا 14ێ، دهۆك- هەولێر، یاریگەها دهۆكێ 19-11-2026.
گەڕا 15ێ، دهۆك- دیالا، یاریگەها دهۆكێ، 28-11-2026.
گەڕا 16ێ، شورتە، دهۆك، یاریگەها شورتە، 4-12-2026.
گەڕا13ێ، كارەبا- زاخۆ، یاریگەها زەورا، 5-11- 2026.
گەڕا 14ێ، زاخۆ- شورتە، یاریگەها زاخۆ، 20-11-2026.
گەڕا 15ێ، زاخۆ- كەربەلا، یاریگەەها زاخۆ، 27-11-2026.
گەڕا 16، جەوییە، زاخۆ، یاریگەها ئەلمەدینە، 3-12-202.
