د. سالار عوسمان، بەرپرسێ پشكا ڕەوشەنبیری و ڕاگەهاندنا پارتی دیموكراتی كوردستان ل بەغدایێ‌ سەرەدانا هەژمارەكا جهان كر.
د. سالار عوسمان، بەرپرسێ پشكا ڕەوشەنبیری و ڕاگەهاندنا پارتی ل رۆژا 4/12/2025 ب هەڤالینیا تەحسین دۆلەمەری، ئەندامێ پشكێ‌ و هەژمارەیەكا هەڤالێن پشكێ‌، سەرەدانا نوونەراتیا حكومەتا هەرێما كوردستانێ‌ ل بەغدایێ‌ كر و ژ لایێ‌ فارس عیسا، سەرۆكی نوونەراتیا حكومەتا هەرێمێ‌ ل بەغدایێ‌ پێشوازی لێ‌ هاتە كرن.
دیسا هەر د هەمان رۆژ دا د. سالار عوسمان، ئەندامێ كۆمیتەیا ناڤەندی و بەرپرسێ پشكا ڕەوشەنبیری و ڕاگەهاندنا پارتی، ب هەڤالینیا هەژمارەیەكا هەڤالێن پشكێ‌، سەرەدانا بارەگایێ‌ لقێ پێنج یێ‌ پارتی ل بەغدایێ‌ كر و ژ لایێ‌ مامۆستا ئازاد حەمید شەفی، بەرپرسێ لقێ‌ و هەژمارەیەكا كارگێڕێن لقێ‌ و كادێن پێشكەفتی یێن لقێ‌ پێشوازی لێ هاتە كرن.
د دیدارەكێ‌ دا هەردو لایان دانوستاندن ل سەر لایەنێ‌ رەوشەنبیری و راگەهاندنێ‌ كر و بڕیار هاتەدان وەرەقەیەكا كارێ‌ هەڤپشك ئامادە بكەن، گرێدای ب چاوانیا گەشەپێدانا كارێ‌ رەوشەنبیری و راگەهاندنێ‌ ل بەغدایێ‌.
دیسا هەر د هەمان رۆژ دا د. سالار عوسمان، بەرپرسێ پشكا ڕەوشەنبیری و ڕاگەهاندنا پارتی، ب هەڤالینیا تەحسین دۆلەمەری، ئەندامێ پشكێ‌ و هەژمارەیەكا هەڤالێن پشكێ‌، ل بەغدایێ‌، سەرەدانا ڕۆژنامەیا (ئەلتەئاخی) كر و ژ لایێ‌ سەرنڤیسەر و كارمەندێن ڕۆژنامەیا ناڤهاتی پێشوازی لێ هاتە كرن.
دیسا هەر د هەمان رۆژ دا د. سالار عوسمان، بەرپرسێ پشكا ڕەوشەنبیری و ڕاگەهاندنا پارتی، ب هەڤالینیا تەحسین دۆلەمەری، ئەندامێ پشكێ‌ و هەژمارەیەكا هەڤاێن پشكێ‌، سەرەدانا شەشەمین پێشانگەها نێڤدەولەتی یا پرتووكان ل باژێڕێ‌ بەغدایێ‌ كر.

رێڤەبەریا گشتی یا باژێڕڤانیان ل پارێزگەها دهۆكێ راگەهاند، ل سەر راسپاردەیا ئەندازیار دیار بەحری، رێڤەبەرێ گشتیێ باژێرڤانیان ل پارێزگەها دهۆكێ‌، دوهی 6/12/2025 تیمێن هەر 41 باژێرڤانیێن سەر ب رێڤەبەریا گشتی ڤە ژ بۆ ئامادەكاریێن كێمكرنا زیانێن بارانێن بۆش و لەهیان و پاقژكرنا مەنهۆل و جهێن كۆمڤەكرنا زێدە یا بارانان كەفتنە د ئامادەباشیێ دا.
ئاشكرا ژی كریە كو ئەڤە د دەمەكی دایە، ل دووڤ پێشبینیێن سەقاناسیێ، رەنگە د ڤان دو ڕۆژان دا بارانێن زێدە ببارن و لەهی دروست ببن، دیسا سەرۆكێ حكومەتا هەرێما كوردستانێ‌ ژی هەموو وەزارەت و رێڤەبەریێن پەیوەندیدار راسپاردینە ئامادەكاریان بكەن و سەر و مالێ وەلاتیان بپارێزن.

دهۆك، لەزگین جۆقی:

جێگرێ رێڤەبەرێ گشتیێ رێك و پران و ئاڤەدانكرن و ئاكنجیبوونێ ل پارێزگەها دهۆكێ راگەهاند، جادەیا ئالۆكا بۆ دهۆكێ ب شێوەیەكێ نوو دێ هێتە چێكرن و دبێژیت: پرا ئالۆكا ئەو نزماتیا جادەیێ نامینیت و پر و جادە دێ هێنە بلندكرن.
رێدیر سلێمان، جێگرێ رێڤەبەرێ گشتیێ رێك و پران و ئاڤەدانكرن و ئاكنجیبوونێ بۆ رۆژناما ئەڤرۆ گۆت: «كار ل سەر دیزاینەكێ نوو بۆ چێكرنا جۆتسایدێ ئالۆكا هاتیە كرن، ئەو جادەیا كەڤن دێ بیتە جادەكا خزمەتگوزاری و جۆتسایدەكێ نوو دێ هێتە چێكرن و پرا ئالۆكا و نزماتیا جادەیێ ژی نامینن دێ هێنە بلندكرن و ب شێوازەكێ گەلەك پشكەفتی دێ جۆتسایدێ ئالۆكا هەتا ناوچەداریا فەیدیێ‌ دێ هێتە چێكرن».
گۆتژی: «نوكە پڕۆژە د قووناغا دیزانیێ دایە و پشتی وەرگرتنا رازیبوونێ‌ و تەرخانكرنا پارەی دەست بجهئینانا پڕۆژەیێ جۆتسایدێ ئالۆكا، هەر ژ دووڕیانا دهۆكێ هەتا دگەهتە ناوچەداریا فەیدیێ دێ‌ هێتە كرن و ب شێوەیەكێ سەردەمیانە دێ هێتە چێكرن».

رەمەزان زەكەریا:

رێڤەبەرێ فەرمانگەها ئاڤا بارزان ئاشكرا كر، پڕۆژەیێ ستراتیژیێ ئاڤێ ل دەڤەرا بارزان د قووناغا دووماهیێ دایە و دبێژیت: ل دەستپێكا سالا نوو دێ ئاڤ گەهیتە مالان، 51 گوند دێ ژ پڕۆژەی مفادار بن و ب گوژمێ 138 ملیۆن دۆلاران و ل گورەی ستانداردێن جیهانی دهێتە بجهئینان و ئاریشەیا ئاڤێ بۆ چەندین سالێن بهێن ل دەڤەرا بارزان دێ‌ چارەسەركەت.
ئەندازیار زیاب مقداد، رێڤەبەرێ فەرمانگەها ئاڤا بارزان بۆ ئەڤرۆ گۆت: «هەتا نوكە 90% پڕۆژەیێ ستراتیژیێ ئاڤا بارزان هاتیە بجهئینان و د ڤێ مەهێ‌ دا دێ تەمام بیت و ل دەستپێكا سالا نوو ب رەنگەكێ تێست كار دێ‌ پێ هێتە كرن و ئاڤ گەهیتە مالان ل دەڤەرا بارزان».
ناڤبری گۆتژی: «پڕۆژەیێ ستراتیژیێ ئاڤا بارزان گەلەكێ‌ مەزنە، هزار و 250 مەترێن سێجا یێن ئاڤێ د دەمژمێرەكێ دا بۆ بلێ و بارزان و 51 گوندێن دەڤەرا بارزان دێ‌ دابین كەت».

دهۆك، دلۆڤان ئاكرەیی:

بەرپرسەكێ بازرگانی و پیشەسازی ل حوكمەتا هەرێما كوردستانێ دیاركر، ژ بەر سەقامگیریا هەرێمێ و پەیوەندیێن ب هێز یێن سەرۆكێ حوكمەتا هەرێما كوردستانێ ل گەل سەركردایەتیا ئیماراتێ، ئەڤ وەلاتە یێ مژوولە ببیتە دووەم مەزنترین وەبەرهێنەر ل كوردستانێ و دبێژیت: حەفتیا بهێت شاندەكێ بازرگانی یێ هەرێمێ ب مەرەما ئیمزاكرنا چەندین یاداشتان و دامەزراندنا ناڤەندەكا ئابووری، دێ سەرەدانا دوبەی و ئەبووزەبی كەت.
گەیلان حاجی سەعید، بەرپرس ل بازرگانی و پیشەسایا حوكمەتا هەرێما كوردستانێ بۆ رۆژنامەیا ئەڤرۆ گۆت: «هەرێما كوردستانێ بۆ وەبەرهێنەرێن ئیماراتی یا گرنگە، چونكی ئەو سەقامگیریا هەرێمێ، وەكو دەرگەهەكێ وەبەرهێنانێ ل هەموو ئیراقێ دبینن، لەوڕا د ماوەیێ سالێن بۆری دا، وەبەرهێنانەكا باش ل ڤێرە كریە، ئەڤە ژی بۆ ڤەژاندنا ژێرخانا ئابوورییا هەرێمێ گەلەك یا گرنگە».
گەیلان گۆتژی: «پەیوەندیێن مەسرور بارزانی، سەرۆكێ حوكمەتا هەرێما كوردستانێ ل گەل سەركردایەتیا ئیماراتێ بووینە ئەگەر وەبەرهێنەرێن ئیماراتی بهێن وەبەرهێنانێ ل هەرێمێ بكەن، دیسا پشتەڤانیا مە ژی دكەت، پەیوەندیێن خۆ ل گەل كۆمپانیێن ئیماراتی بەرفرەهتر و باشتر بكەین، بۆ ڤێ مەرەمێ‌ سوبەهی شاندەكێ مە دێ سەرەدانا ئیمارات و دوبەی و وەلاتێن دی كەت و یاداشتا تێكگەهشتنێ ل گەل پشكەك ژ كۆمپانیێن ئەبووزەبی و دوبەی ئیمزا كەت، هەروەسا ب هەماهەنگی ل گەل ئیماراتێ‌ دێ‌ ناڤەندەكا كاروبارێن ئابووری ل هەرێما كوردستانێ دامەزرینن».

دلۆڤان ئاكرەیی

رێڤەبەرێ كەمپا خانكێ سەر ب قەزا سێمێلێ ڤە دیار كر، دوو هزار و 140 خێزان دناڤ كەمپا خانكێ دا ماینە، بەری نوكە هەتا 400 خێزانێن ئاوارە ڤەگەریانە شنگالێ ژ وانا ژی هەتا 300 خێزانان دووبارە ژ شنگالێ ئاوارە بووینە و قەستا ناحیا خانكێ سەر ب قەزا سێمێلێ كریە و دووبارە دناڤ كەمپاند هاتنە ئاكنجیكرن.

پیر عەلو، رێڤەبەرێ كەمپا خانكێ بۆ رۆژنامەیا ئەڤرۆ گۆت: ب هیڤیا حوكمەتا ئیراقێ ڤە رەوشا ئاواران دناڤ كەمپاندا یا باش نینە و باش ژی نابیت، ژبەركۆ حۆكمەتا ئیراقێ هەڤكاری و پشتەڤانیا ئاواران ناكەت، نوكە حۆكمەتا هەرێما كوردستانێ و دەزگەهێ خێرخوازیێ بارزانی هەڤكاری و پشتەڤانیا ئاواران دكەن، خزمەتگوزاریێن وەك ساخلەمی و پەروەردە و ئاڤ و كەهرەب و باژێرڤانی ژلایێ حوكمەتا هەرێما كوردستانێ بۆ ئاواران دهێنە دابینكرن و ئەڤ سالە هەتا نوكە ئەم گەهشتینە هەیڤا نێزیكی هەیڤا ١٢ رێژەیەكا كێم یا ئاهێن خوارنێ بۆ ئاواران هاتینە دابینكرن هەتا حوكمەتا ئیراقێ بەهرا ئاواران ژ ئاهێن خوارنێ ژی نادەت كۆ پێدڤیە حوكمەتا ئیراقێ هەڤكاری و پشتەڤانیا ئاواران بكەت.
گۆت ژی: ئەڤە 11 سالێن خەلكێ شنگالێ ئاوارە و دناڤ كەمپاندایە، هەتا نوكە ئیراقێ خێڤەتێن ئاواران نەگۆهۆڕینە و هندەك ئاواران ب بلوكان جهێن خۆ چێكرینە، خێڤەت كەڤن بووینە و پێدڤیە بهێنە گۆهۆڕین، دەمێ ئاوارە ڤەگەریاینە شنگالێ هندەكا خیڤەتێن خۆ راكرن دگەل خۆ برن، دەمێ دووبارە ئاوارە دبن داخوازا خیڤەتان دكەن.
زێدەتر گۆت: هندەك ئاوارە ڤەدگەرنە شنگالێ و هندەك ژی دووبارە ژ شنگالێ ئاوارە دبن و رۆژانە ئاوارێن كۆ چووینە شنگالێ قەستا كەمپا خانكێ دكەن و داخوازا جهێن ئاكنجیبوونێ دكەن كۆ پتریا ئاوارێن ڤەگەریاینە شنگالێ ژ كەمپا خانكێ دووبارە ژ شنگالێ ئاوارە بووینە ژبەر خرابیا رەوشا شنگالێ و نەبوونا خزمەتگوزارییان خەلك دووبارە ژ شنگالێ د ڤی وەرزێ سەرمایێ دا ژی ئاوارە دبن.
پیر عەلو، رێڤەبەرێ كەمپا خانكێ زێدەتر گۆت: ئاوارێن ڤەگەریاینە شنگالێ بەردەوام ئاڤا ڤەخوارنێ دكرن و خەلكی شیان نینە ئاڤا ڤەخوارنێ بكرن ژ ناچاری خەلكێ شنگالێ دووبارە مالێن خۆ بجهـ دهێلن و قەستا ناڤ كەمپان دكەن گەلەك جاران حۆكمەتا ئیراقێ بزاڤێ دكەت كەیسا ئاواران ب دووماهی بینیت، لێ نەشیایە ژبەركۆ خەلكی باوەرێ نینە ڤەگەرنە شنگالێ.