سەرۆك مەسعود بارزانی ڕاگەهاند، هەكە ڕێككەفتنا ل گەل چوارچۆڤەیێ هەماهەنگییا شیعەیان نەهێتە بجهئینان، هیچ ڕامانەك بۆ مانا وان د حوكمەتا ئیراقێ دا نامینیت و گۆت ژی: ل بەغدایێ دەست ب پیلانی ل دژی پارتی دیموكراتی كوردستان هاتییە كرن و مەترسییا وێ یێ چەندێ نەڤەشارت ژی كە پشتی ڤەكێشانا هێزێن هەڤپەیمانان ژ ئیراقێ، هەمان سیناریۆیا 2014ێ دووبارە ببیتەڤە و داعش جارەكا دی بزڤڕیتەڤە.
سەرۆك مەسعود بارزانی، د هەڤپەیڤینەكێ دا ل گەل كەنالێ شەرقییە، باسێ چەندین پرسان كو تایبەتن ب ئیراقێ و هەرێما كوردستانێ و دەڤەرێ كر.
د بەرسڤا وێ پرسیارێ دا كە ئیراقێ هێزێن لەشكەری، دژە تیرۆر، حەشد و پێشمەرگە هەنە، سەرۆك بارزانی گۆت: «سالا 2011 نێزیكی 100 هەزار سەربازێن ئەمریكی هەبوون و دیدارێن زۆر ل بەغدایێ هاتنە كرن و ئەز ژی د چەندین ژ وان دیداراندا پشكدار بووم سەبارەت وێ چەندێ كو ڕێككەفتنا دووقۆلی ل گەل ئەمریكایێ بكەین یان پێدڤییە دەربكەڤیت؟ د كۆمبوونەكێ دا كو وەزیرێن ناڤخوە و بەرگریێ ئامادەبوون، من گۆت برایێن هێژا ئەم باسێ وی بابەتی دكەین بلا پرسیارێ ژ ڤان بكەین ئەوێن پەیوەندییا ڕاستەوخوە ب پرسا ئەمنی ڤە هەی، وی دەمی دبیت وەزیرێ بەرگریێ عەبدولقادر عوبەیدی بوو و وەزیرێ ناڤخوە جەواد بۆلانی بوو زۆر ژی دپشتڕاست نینم، مە پرسیار ل دۆر وێ چەندێ ژێ كر كو ئەرێ هەوە شیانێن وێ چەندێ هەنە بەرگریێ ژ وەلاتی بكەن؟ وەزیرێ بەرگریێ گۆت: ب خودێ هیچ تشتەكێ من نینە. مە گۆتێ پا تۆ وەزیرێ ناڤخوە؟ وی ژی گۆت: ب خودێ ئەم نەشێین پاراستنا بنگەهەكێ ژی بكەین».
سەرۆك مەسعود بارزانی پرسیارا وێ چەندێ كر، باشە ئانكو ئەم باسێ چ بكەین؟ هندەك ژ وان پێداگربوون و موزایەدە كرن و وی دەمی من پرسیار ژ وان كر، باشە ئەفسەرەكێ ئەمریكی نەشێت بهێتە د ناڤ ڤی هۆلێ دا و مە هەموویان دەستەسەر بكەت؟ ئێك ژ وان نافێ وی ل بیرا من نەمایە گۆت: ب خودێ نەكو ئێك ئەفسەر، بەلكو سەربازەكێ ئەمریكی ژی دشێت وی كاری بكەت، من ژی گۆتێ باشتر نینە ب كێمی ڕێككەفتنەك هەبیت، دا كو دەمێ داگیركاری ب دووماهی بهێت و سەروەرییا خوە وەربگرینەڤە؟ بلا ڕێككەفتنەكێ بكەین، وی دەمی ئەمریكی چوون و داعش هات.
سەرۆك بارزانی دبێژیت: «نوكە ژ هەمان سناریۆ دترسم، بەلێ ڕەوش جودایە، سالا 2014ێ پشتی كو داعش هاتی، حوكمەتا ئیراقێ پەیوەندی ب ئەمریكا و وەلاتێن ئۆرۆپی و ناتۆیێ كر و گۆتن وەرن ژ بۆ خاترا خودێ هاریكارییا مە بكەن».
د پشكەكا دی یا ئاخڤتنێن خوە دا، سەرۆك مەسعود بارزانی ڕۆهنكرن دا سەر وێ چەندێ كو ئاستەنگ بەرامبەر سەرۆكوەزیرێن بەرێ یێن ئیراقێ هەبوون «هیچ سەرۆكوەزیرەك سەربەست نەبوویە و دەستهەلاتا تەمام نەبوویە، بەردەوام ئاستەنگ هەبوون، تا ڕادەیەكی ئیرادەیا وان هاتبوو زەوتكرن، ئەڤ حزبێن هەیین دەستهەلات ب سەر دا هەبوویە، ب پلەیا ئێكێ چارچۆڤەیێ هەماهەنگیێ بەرپرسە، ئەودەستهەلاتدارە و ئەڤە شاشییەكا مەزنە».
سەرۆك بارزانی دوپاتكر «نابیت پێكهاتەیەك ب تنێ فەرمانڕەواییێ بكەت، نوكە ژی ب نێزیكی هەموو تشت د دەستێ وان دانە و دەستهەلات هەموو د دەستێ وان دایە، فەرمانڕەوایی شیعییە، هەكە بزڤڕین بۆ بنەمایێ هەڤپشكیێ؛ سازان و هەڤسەنگیێ و ئەو بنەمایە هاتە بجهئینان، باشە، هەكە بەردەوامیێ بدەنە هەمان پەیڕەوێ كەڤن، ئەڤە ب ڕامانا وێ چەندێ یە كو ئەڤەنە فەرمانڕەوایی یە».
سەرۆك مەسعود بارزانی ئەوژی گۆت «هەكە سەدری و پارتی دیموكراتی كوردستان و ئالییێن دی د حوكمەتێ دا نەبن ئەڤە حوكمەت دێ ئیفلیج بیت و پر ژ كێماسییان بیت.» سەبارەت ڕوونشتنا جڤاتا نوونەران بۆ دەنگدانێ ب وەزیرێن كابینەیا عەلی زەیدی، سەرۆك مەسعود بارزانی گۆت: «نەخێر ڕازی نینین، پشكەك بوو ژ پیلانێ، ڕەنگە ڤان هزر كربیت ب ڤی شێوەیی هێزا خوە نیشانی پارتی د دەن، ب وێ چەندێ كو ئەڤە كوتلەیەكا مەزنن و سەركردایەتییا ئیراقێ دكەن و پارتی پشتگوه دهاڤێژن، دبیت ڤان جۆرە خەیالەك هەبووبیت، هیچ كەسەك نەشێت وی كاری بكەت، گەلەك بزاڤ كرن پارتی پشت گوه بهاڤێژن، بەلێ پشتی هینگێ ئەو ب خوە هاتنە پشتگوه هاڤێتنو پارتی هەر ما».
سەرۆك مەسعود بارزانی گۆت ژی «ئەم د وێ حوكمەتێ دا پشكدار بووین، دەمێ ئەم زڤڕین بەر ب بەغدایێ، پشتی وێ ژی پارتی تووشی پیلانەكێ بوو، ڕێككەفتنامەیەكا ئیمزاكری مە هەبوو د ناڤبەرا نێچیرڤان بارزانی، جێگرێ سەرۆكێ پارتی و چارچۆڤەیێ هەماهەنگیێ كو ژ ئالیێ هادی عامری ڤە هاتبوو ئیمزاكرن، ل سەر بنەمایێ وێ ڕێككەفتنێ بڕیار هاتە دان ئەم پشكداریێ د وێ حوكمەتێ دا بكەین و پێدڤییە بهێتە بجهئینان، ئەگە نە هیچ ڕامان و بهانەیەك بۆ مانا مە د حوكمەتێ دا نامینیت».
سەبارەت دیارترین بەندێن وێ ڕێككەفتنێ، سەرۆك بارزانی گۆت «ل ڤان نێزیكان دێ ڕاگەهینین، ڕێككەفتن، بەری پێكهێنانا حوكمەتێ هاتییە كرن. د ڕێككەفتنێ دا هیچ تشتەك تێدا نینە د دەرڤەی دەستووری دا بیت و بەروڤاژییا دەستووری بیت. هەكە ڕێككەفتن نەهێتە بجهئینان، پێدڤی ب مانا مە د وێ حوكمەتێ دا ناكەت. كێشە نە ئەوە تە پۆست هەیە و وەزیر هەیە، كێشەیا بنەڕەتی هەیە، كێشە كەڤنن و مە ئاریشە ل گەل هەنە، ماف، هەڤپشكی و شكۆمەندی».
سەرۆك بارزانی ئاماژە ب وێ چەندێ كر «د سەردەمێ پێكهێنانا حوكمەتێ دا، هندەك ئالییێن د ناڤ چارچۆڤەیێ هەماهەنگیێ دا و هندەك ئالییێن د ناڤ سوننەیان دا دەست ب پیلانی ل دژی پارتی كر، پشتی هینگێ مە بەرپەرەكێ نوو ل گەل وان ڤەكر».
سەبارەت پرسا هەبوونا چەكی د دەستێ دەولەتێ دا، سەرۆك بارزانی گۆت «هیڤیدارین بابەتی چەكدانانێ نەگەهیتە شەڕی، ئەڤە د بەرژەوەندییا ئیراقێ و هەرێما كوردستانێ و هیچ كەسەكێ دا نینە، بەلێ ئەو كارە دێ چەوا هێتە كرن؟ ئەز ب زەحمەت دبینم پشتی 30ی ئیلۆنێ، هەكە ئەڤە پشتی هینگێ ب چەند مەهان ژی هاتە چارەسەركرن دێ بیتە سەركەفتن بۆ هەموو ئیراقێ، هەروەسا بۆ وان گرۆپێن چەكدار ژی. ئەوا گرنگ ئەوە كو ئەو چەكە كۆنترۆلكری بیت، هەكە بهێتە بكارهینان، پێدڤییە ب فەرمانا فەرماندەییا گشتی بیت، نەكو هەر كەسەك ب ئارەزوویا خوە ڕەفتارێ بكەت».
سەرۆك بارزانی ئاماژە كر «پێدڤییە ئەڤ دۆسییە ب ئاشتییانە بهێتە چارەسەركرن، هەكە ل گەل ئیرانێ یان هەر وەلاتەكێ دی بیت كارەكێ باشە بهێتە چارەسەركرن، بەلێ ئەوا ئەز دبینم كارەكێ دژوارە كو بهێتە بجهئینان، چونكی خەلكەك هەیە ژ ڤێ ڕەوشێ مفادارن و دەستبەرداری چەكی نابن».
گۆت ژی «پێدڤییە گڤاشتنا ئەمریكا ل بەر چاڤ بهێتە وەرگرتن، بابەتەكێ زۆر گرنگە، هەكە ئەمریكا سزایان ب سەر ئیراقێ دا بسەپینیت. لەوما چارەسەركرنا بابەتێ چەكی د بەرژەوەندییا ئیراقێ دا یە، هەكە نەهاتە چارەسەركرن، ئیراق دێ تووشی كێشەیێن مەزن بیت، ژ وان سزادان و گۆشەگیركرنا ئیراقێ».

سەرۆكێ هەرێما كوردستانێ پێشوازی ل بالیۆزێ نوو یێ سویسرایێ ل ئیراقێ كر و خواستا هەرێما كوردستانێ بۆ پێشئێخستنا پەیوەندییان دوپات كر.
ل گۆرەی بەیاننامەیەكا سەرۆكایەتییا هەرێما كوردستانێ، نێچیرڤان بارزانی، سەرۆكێ هەرێما كوردستانێ، د دیدارەكێ دا ل گەل پیتەر نێلسۆن، بالیۆزێ نوو یێ سویسرایێ ل ئیراقێ، پیرۆزباهی ل دەستبكاربوونا وی كر و هیڤییا سەركەفتنێ د ئەركێ وی دا بۆ خواست.
د دیدارێ دا، سەرۆكێ هەرێما كوردستانێ سوپاسییا پشتەڤانییێن سویسرایێ بۆ ئیراقێ و هەرێما كوردستانێ كر و خواستا هەولێرێ ژی بۆ پتر پێشئێخستنا پەیوەندییان ل گەل وی وەلاتی دیار كر.
ژ ئالیێ خوە ڤە، بالیۆزێ نوو یێ سویسرایێ خوەشحالییا خوە ب دەستبكاربوونا خوە ل ئیراقێ نیشا دا و دوپاتی ل سەر داخوازییا وەلاتێ خوە بۆ پێشئێخستنا پەیوەندییێن خوە ل گەل ئیراقێ و هەرێما كوردستانێ و بەرفرەهكرنا هەڤكارییێن هەڤپشك د ناڤبەرا وان دا كر.
گەنگەشەكرنا ڕەوشا ئیراقێ و هەرێما كوردستانێ، ل گەل دووماهی پێشهاتێن ندەڤەرێ، تەوەرەكێ دی یێ گدانوستاندنێن د ناڤبەرا نێچیرڤان بارزانی و پیتەر نێلسۆنی دا بوو.

سەرۆكێ هەرێما كوردستانێ پێشوازی ل بالیۆزێ نوو یێ نەمسایێ ل ئیراقێ كر و بەرهەڤییا هەرێما كوردستانێ بۆ پێشئێخستنا پەیوەندییان و هەڤكارییا هەڤپشك دیار كر.
ل گۆرەی بەیاننامەیا سەرۆكایەتییا هەرێما كوردستانێ، نێچیرڤان بارزانی، سەرۆكێ هەرێما كوردستانێ، د دیدارەكێ دا ل گەل ئەكسل ڤێش، بالیۆزێ نوو یێ نەمسایێ ل ئیراقێ، پیرۆزباهی ل دەستبكاربوونا وی كر و هیڤییا سەركەفتنێ د ئەركێ وی دا بۆ خواست.
د دیدارێ دا، سەرۆكێ هەرێما كوردستانێ سوپاس و پێزانینێن خوە بۆ دیرۆكا پەیوەندییێن هەڤالینیێ و پشتەڤانییێن بەردەوامێن نەمسایێ دوپات كر، هەروەسا بەرهەڤییا دامودەزگەهێن هەرێما كوردستانێ بۆ سەرئێخستنا كارێن بالیۆزێ نوو و پێشئێخستنا پەیوەندییان دیار كر.
ژ ئالیێ خوە ڤە، ئەكسل ڤێش خوەشحالییا خوە ب وەرگرتنا ئەركێ خوە نیشا دا و دوپاتی ل سەر داخوازییا وەلاتێ خوە بۆ پتر بهێزكرنا پەیوەندییان ل گەل ئیراقێ و هەرێما كوردستانێ و بەرفرەهكرنا ئاستێ هەڤكارییێن هەڤپشك د بوارێن جودا جودا دا كر.
گەنگەشەكرنا پەیوەندییێن د ناڤبەرا هەولێرێ و بەغدایێ دا، ڕەوشا گشتی یا دەڤەرێ و چەند پرسێن دی یێن جهێ گرنگییاهەڤپشك، تەوەرەكێ دی یێ دانوستاندنێن د ناڤبەرا نێچیرڤان بارزانی و بالیۆزێ نوو یێ نەمسایێ دا بوو.

نێچیرڤان بارزانی، سەرۆكێ هەرێما كوردستانێ، ب هەلكەفتا دووماهیهاتنا ئەركێ وی وەك قونسلێ گشتییێ فەلەستینێ ل هەرێما كوردستانێ، پێشوازی ل بالیۆز د. ماهر ئەلكەرەكی كر.
د دیدارەكێ دا، سەرۆكێ هەرێما كوردستانێ سوپاسییا بزاڤێن د. ماهر ئەلكەرەكی كر بۆ پێشئێخستنا پەیوەندییان د دەمێ كاركرنا وی دا ل هەرێما كوردستانێ، هەروەسا هیڤییا سەركەفتنێ د ئەرك و كاری نوو یێ وی دا بۆ خواست.
ژ ئالیێ خوە ڤە، بەرێز ئەلكەركی سوپاس و پێزانینێن خوە بۆ سەرۆكایەتییا هەرێما كوردستانێ و ئالییێن پەیوەندیدارێن هەرێمێ دیار كر بۆ وێ هەڤكاری و پشتەڤانییا د دەمێ كاركرنا وی دا پێشكێشی وی كرین، هەروەسا پێزانینێن خوە بۆ هەڤالینی و پەیوەندییا دیرۆكی یا د ناڤبەرا هەردوو ئالییان دا دوپات كر. ڕەوشا دەڤەرێ و دووماهی پێشهات، تەوەرەكێ دی یێ دیدارێ بوو.