ئەڤرۆ نیۆز،قائید میرۆ:

ئەڤسالە ٤٤ د بۆرن لسەر دەستپێکرنا شۆڕشا گولانێ و فەرماندەیەکێ پێشمەرگەی ژی ئاماژەکر، پێشمەرگە شیا بەرسینگا مەزنترین رژێما ستەمکار ل دەڤەرێ بگریت و دبێژیت، سەرۆک بارزانی ژی رۆلەکێ بەرچاف د شۆڕشا گولانێ دا ھەبو.

رەشید یاسین یێ بەرنیاس ب رەشێ بانیێ فەرماندێ پێشمەرگەی بۆ ئەڤرۆ نیۆز دیارکر” رێکەفتناما خیانەتکاریا جەزائیر بۆ ئەگەرێ ڤێ چەندێ شۆڕشا ئیلوولی بھێتە راگرتن، بەلێ پێشمەرگە یێ بەرھەڤنەبو خۆ رادەستی چو دوژمنەکی و چو دەولەتەکێ بکەت، ھەرچەندە کاودانێن وی سەردەمی د بەرتەنگ بوون، بەلێ ئەم چووینە بەرەف دەڤەرێن سینوری پشتی کو ئەم شیاین وەک پارتی و پێشمەرگەیێن بارزانی خۆ رێک پێخین دوبارە ئەم ڤەگەڕیاین و بە فەرماندەیی و پشکداریا راستەوخۆیا سەرۆک بارزانی و شەھید ئیدریس ئێکەم چریسکا شۆڕشا گولانێ ل ٢٦ی ھەیڤێ ل حاجی ئومەران ھاتە ھەلکرن.

پێشمەرگەی د شۆڕشا گولانێ دا گورزێک کوژەک ل ھێزێن رژێمێ دان

رەشید یاسین، کو پشکداریەکا کارا د شۆڕشا گولانێ دا ھەبو خویاکر” سەرۆک بارزانی رۆلەکێ بەرچاف د شۆڕشا گولانێ دا ھەبو، ھەرچەندە ئەرکێ سەرۆک بارزانی ل ھەموو کەسەکێ گرانتربو، چونکە ژبلی سەرپەرشتیکرنا ھێزێن پێشمەرگەی مە بھزاران ئاوارە ل ئیرانێ ھەبوون د رەوشەکا دژواردابوون و کارۆبارێن حزبێ ھەبوون، بەلێ ب ھەموو شیانێن خوە سەرۆک بارزانی دگەل شۆڕشێ بو.

ئەڤی فەرماندێ شۆڕشێ گۆتژی” پێشمەرگەی د شۆڕشا گولانێ دا ب گیانەکێ کوردایەتی و تژی ڤیان بەرسینگا مەزنترین رژێما ستەمکار دگرت و چەندین گورزێن کوژەک ل ھێزێن دوژمنی دان، ژوانژی داستانا داستانا ناڤودەنگا خواکۆڕکی ھاتە تۆمارکرن و ل زاخۆ ھەتا ناف بەرواریا و دگەھیتە شیلادزێ و دەڤەرا بارزان و حاجی ئومەران و بۆ دەڤەرا سلێمانیێ رۆژانە پێشمەرگەیێن پارتیزان چالاکی ھەبوون.