پشتی ب دووماهی هاتنا یاریێن گەڕا چارێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌ ب فەرمی فدراسیۆنا فوتبۆلا ئیراقێ‌ بڕیار دایە ب ڕاوەستاندنا هەڤڕكیێن خولێ‌ هەتا ماوەیێ‌ 10 رۆژان ژبەر پشكدارییا هەلبژارتیێ ئیراقێ‌ د ڤاڤارتنێن مۆندیالا جیهانی دا.
ل دووڤ دەنگۆباسێن ڕۆژنامەڤانی فدردراسیۆنا یارییا ناڤهاتی یا ئیراقێ‌ بڕیاردا هەڤڕكیێن گەڕا پێنجێ‌ بۆ دو حەفتییان بهێتە ڕاوەستاندن ژبۆ خوە بەرهەڤكرنا هەلبژارتیێ‌ ئیراقێ‌ بۆ ڤاڤارتنێن دووماهیێ‌ یێن دەربازبوون بەر ب مۆندیالا جیهانی ئەوا بڕیارە د پاشكۆ دا یاریێن خوە دگەل هەلبژارتیێن ئەندۆنیزیا ل 11ێ‌ ڤێ‌ مەهێ‌ و سعۆدیێ‌ ل 14ێ‌ ڤێ‌ مەهێ‌ بكەت، ئەوا دهێتە چاڤەڕێ‌ كرن هەردو یاری دی ل وەلاتێ‌ سعۆدیێ‌ هێتە كرن، شەش هەلبژارتیێن پاشكۆیا دووماهیێ‌ دەربازبووینە هاتینە بەلاڤكرن ل سەر دو كۆما، هەر كۆمەكێ‌ ئێك هەلبژارت دێ‌ دەربازبیتە مۆندیالێ‌.
شرۆڤەكارەكێ‌ وەرزشی: دهۆك پێدڤی ب گوهۆڕینانە
ژلایێ‌ خوەڤە سلێمان زەكی شرۆڤەكارێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: پشتی فدراسیۆنا فوتبۆلا ئیراقێ‌ بڕیارا راوەستاندنا خولا ستێران دایی ژبەر هەلبژارتیێ‌ وەلاتێ‌ خوە د ڤاڤارتنێن پاشكۆ بۆ مۆندیالا جیهانی، ئەڤ بڕیارە باشترین دەلیڤەیە بۆ تیما دهۆكێ‌ پێداچوونەكێ‌ ل سەر تیما خوە بكەت، ژلایێ‌ دەرۆنی، ئاستی و پێگهاندنێ‌، ب مخابنیڤە تیما دهۆكێ‌ د چار یاریێن بۆری هیچ خالەك كۆم نەكرییە ئانكۆ چار خوسارەتی ئەڤە ژی نیشانێن هەبوونا شاشی و كێماسییانە دناڤ تیمێ‌ دا، ڕاهێنەرێ‌ پێشتر یێ‌ بەرازیلی د دو یارییان دا نەشیا چبكەت، لەوما ژی ڕاهێنەر سلێمان رەمەزان ژی نەشێت چ بكەت، ژبەركو تیم پێدڤی ب گوهۆڕینانە هەتا ڤەكوهاستنێن زڤستانێ‌، د نوكە دا یا د ڕەوشەكا خراب دایە و دڤێت كارگێری جارێ‌ كار ل سەر ڤەگەڕاندنا دەرۆنێ‌ یاریزانی و دووڤچوونا شاشیێن وان بكەت و بهێتە چارەسەكرن.
هەروەسان ناڤهاتی گۆت: ئەڤ ڕاوەستیانە نە بتنێ‌ بۆ دهۆكێ‌ باش بوو، بەلكو بۆ پرانییا ئەوان یانەیێن تووشی خوسارەتی و ئاست لاوازیێ‌ بووینە نموونە یانەیا زەورا ئەوا ڕاهێنەرێ‌ خوە دەرئێخستی و نەورۆز ئەوا بتنێ‌ ئێك سەركەڤتن ئینایی، هەروەسان بۆ تیما زاخۆ ژی باش بوو ژبەركو یا بەرهەڤییا بۆ یارییا دویێ‌ ژ كۆپا كەنداڤی دكەت، ئانكو ب گشتی ڕاوەستاندنا خولێ‌ وێستگەهەكا باش بوو بۆ پرانییا یانەیان و زێدەتر بۆ دهۆكێ‌ باشترین بڕیار بوو.
زاخۆ بەرهەڤییان بۆ كەنداڤی دكەت
تیما فوتبۆلا یانەیا زاخۆ ب سەرپەرشتییا ڕاهێنەرێ‌ خوە یێ‌ قەتەری ویسام ڕزق بەرهەڤییان بۆ یارییا خوە یا دویێ‌ ژ كۆپا كەنداڤی دگەل یانەیا سترە یا بەحرێنی كەت، ئەوا دێ‌ ژ چارچووڤەیێ‌ هەڤڕكیێن كۆما ئێكێ‌ ل 22ێ‌ ڤێ‌ مەهێ‌ وەلاتێ‌ بەحرێنێ‌ مێڤاندارییا وێ‌ كەت، د یارییا ئێكێ‌ دا ئەوا ل حەفتییا بۆری هاتییە كرن یانەیا زاخۆ ل یاریگەها دهۆكێ‌ شیابوو سەركەڤتەكا باش و گرنگ ل سەر یانەیا ئەلقادسیە یا كوێتی بینت ب سێ‌ گۆلان بەرانبەر گۆلەكێ‌، یانەیا عەین ب چار گۆلان بەرانبەر گۆلەكێ‌ سەركەڤتن ل سەر سترە ئینابوو.
تاها عەبدولحەكیم هاتە دووركرن
لژنەیا دێسپلینێ‌ ل فدراسیۆنا فوتبۆلا ئیراقێ‌ ب فەرمی بڕیارا دا سەرپەرشتێ‌ تیما زاخۆ تاها عەبدولحەكیم بۆ ئێك یاری ژ هەڤڕكیێن خولا ستێرێن ئیراقێ‌ هاتە سزادان، ئەوا پشتی یارییا وان بەرانبەر دیالا 2-1 تووشی خوسارەتیێ‌ بووین، سەرپەرشتێ‌ تیما زاخۆ چوویە دناڤ یاریگەهێ‌ دا وسڤكاتی ب دادڤانێ یاریێ‌ كری، ئەڤ بڕیارە یانەیا دهۆك دشێت نە ڕازیبوونێ‌ ل سەر بكەت.
زنار زوبێر: سزایێ‌ محەمەد سەعید هاتە كێمكر
د داخویانیەكێ‌ دا بۆ رۆژنامەیا ئەڤرۆ زنار زوبێر پارێزەرێ‌ یانەیا دهۆك گۆت: پێشتری چار مەهان لژنەیا ڕێكاریێ‌ ل فدراسیۆنا فوتبۆلا ئیراقێ‌ یاریزانێ‌ تیما مە محەمەد سەعید بۆ ماوەیێ‌ ئێك سال ڕاگرت بوو دیسان ب كۆژمەیێ‌ 15 ملیۆن دیناران ژی سزادابوو، لێ‌ یانەیا دهۆك ئەز ڕاسپاردبووم ژبۆ دووڤچوون و تانەدانا ڤێ‌ بڕیارێ‌ یا زولم و گران، بەرانبەر لژنەیا تێهەلچوونێ‌ دگەل نڤیسارا پشكا نەهێلانا گۆنەهباریان ل ڕێڤەبەرییا پۆلیسێن پارێزگەها دهۆكێ‌ و ڕاپۆرتا شارەزایێ ڕێڤەبەریێ‌ پێشكێشكی لژنەیا تێهەلچوونێ‌ كری، خوەشبەختانە ئەڤ سزایە هاتە كێمكرن و سێ‌ مەهێن خوە یێن بووینە سزا ژی دەرباز كرن، د نوكە دا محەمەد سەعید دشێت یارییان بكەت بتنێ‌ سزایێ‌ دارایی یێ‌ مایی كو ئەو ژی هاتبوو كێمكرن بۆ پێنچ ملیۆن دینارن.
بۆ زانین فدراسیۆنا فوتبۆلا ئیراقێ‌ ل خزیرانا بۆری یاریزانێ‌ یانەیا دهۆك محەمەد سەعید ژبەر كۆمێنتەكێ‌ بۆ ماوەیێ‌ ئێك سال دووركربوو ژ چالاكیێن فوتبۆلا ئیراقێ‌ و ب كۆژمەیێ‌ 15 ملیۆن دیناران ژی هاتبوو سزادان، پشتی بەلگەیێن پێدڤی یێن ڕێڤەبەرییا پشكا نەهێلانا گۆنەهبارییان پێشكێشكری دیاربوو هژمارەیا وی یا تۆرێن چڤاكی فێسبۆك هاتبوو هاككرن كو نڤێسینەكا نە جوان دژی مەزهەبەكێ‌ ئاینی هاتبوو بەلاڤكرن ل سەر ناڤێ‌ وی و یێ‌ ئاگەهدار نەبوو، لێ‌ ڕاپۆرتێن نڤێسینگەها گونەهبارییان و پارێزەرێ‌ یانەیێ‌ ئەڤ یاریزانە بێ‌ گونەهكر، هەژی یە بێژین د نوكە دا محەمەد سەعید وەكو یاریزان نەمایە دگەل دهۆكێ‌.
هەولێر ل سەرێ‌ لیستێ‌ یە و دهۆك دووماهیێ‌ دهێت
ب دووماهی هاتنا یاریێن گەڕا چارێ‌ ژ خولا ستێرێن ئیراقێ‌ ڕێزبەندیێن یانەیێن كوردستانی ل جهێن جودانە، هەرچەندە نا بیتە پیڤەر بۆ ڕێزبەندییا گشتی لێ‌ ڕامانەكە كو تا ڕادەیەكی ئاستێن یانەیا دیاركرینە، ڕێزبەندی بڤی شێوەیی یە.
1- هەولێر 10 خال.
2- ئەلغراف 10 خال.
3- دیالا 10 خال.
4- شورتە نەهـ خال، كێمتر یارییەكێ‌.
5- جەوییە نەهـ خال.
6- تەلەبە هەشت خال.
7- مووسل حەفت خال.
8- ئەلكەرخ حەفت خال.
9- ئەلگەرمە حەفت خال.
10- زاخۆ شەش خال.
11- مینا شەش خال.
12- ئەمانەت بەغدا شەش خال.
13- نەفت پێنچ خال.
14- نەورۆز سێ‌ خال.
15- نەفت میسان سێ‌ خال.
16- زەورا دو خال كێمترییا یارییەكێ‌.
17- كارەبا خالەك.
18- ئەلقاسم خالە.
19- نەجەف بێ‌ خال.
20- دهۆك بێ‌ خال.
نەهـ یاریزانێن گۆلكەرێن دەستپێكی
هەر ئێك ژ محەمەد خال- یانەیا ئەلكەرخ و پیشەكارێ‌ هەولێرێ‌ شیرزدوتیمیرۆڤ چار گۆل ئیناینە رێزێن ئێكێ‌ و دویێ‌ دهێن، دووڤدا ئەو یاریزانێن سێ‌ گۆل هەین هەر ئێك ژ ئاسۆ رۆستەم- یانەیا نەورۆز، ئەلحارس حاتم -جەوییە، پیشەكارێ‌ مووسل رۆش فیۆنینگ، پیشەكارێ‌ شورتە مەحمود ئەلمواس، موستەفا قابیل- یانەیا هەولێر، وەگاع رەمەزان- یانەیا دیالا و عەلا ئەلدالی ژ یانەیا مووسل رێزێن سێیێ‌ هەتا نەهێ‌ ل دووڤ ئێك دهێن.
یاریێن گەڕا پێنجێ‌
دهێتە چاڤەڕێ‌ كرن دبیت ل 16ێ‌ ڤێ‌ مەهێ‌ هەڤڕكیێن خولا ستێرێن ئیراقێ‌ ڤەگەڕیت پشتی ب دووماهی هاتنا ڤاڤارتنێن دەربازبوونێ‌ بۆ مۆندیالا جیهانی و ئەنجامدانا هەلبژارتیێ‌ ئیراقێ‌ دو یاریێن خوە، یاریێن گەڕا پێنجێ‌ دێ‌ بڤی شێوەیی هێنە كرن.
نەورۆز- دهۆك، زاخۆ- مووسل، هەولێر- شورتە، جەوییە- ئەلغراف، ئەلقاسم- زەورا، ئەلگەرمە- كارەبا، دیالا- مینا، نەجەف- تەلەبە، نەفت میسان- كەرخ، نەفت- ئەمانەت بەغدا، بۆ زانین هێشتا ژڤان و دەمێ‌ دروست یێ یاریێ‌ نە هاتییە ڕاگەهاندن.

قەیس وەیس:

ددوماهی كۆمبوونا خوە یا ئاسایی دا فدراسیۆنا فوتبۆلا كوردستانێ‌ رۆزنامە و بابەتێن گرێدایی بۆ وەرزێ‌ نوو یێ‌ چالاكیێن خوە ب چەندین بڕیار و ڕاسپاردە دیاركرن، ئەوا دهێتە چاڤەڕێ‌ كرن وەرزێ‌ ئەڤ سالە ب شێوەیەكێ‌ جودا بهێنە كرن.
ل دووڤ ئەوان بڕیارێن هاتینە دان بڤی شێوەیی بووینە
1- ب فەرمی پەسەند ل سەرخوەڤەكێشانا هەر سێ‌ یانەیێن برایەتی، پیشەسازی و هەلۆ ژ خولا پلا نایابا كوردستانێ‌، دیسان نابیت پشكداریێ‌ د خولێن ل بن 17 سالی و 19 سالی یێن وەرزێ‌ نوو ژی بكەن
2- وەرزێ‌ نوو یێ‌ خولا پلا نایابا كوردستانێ‌ دێ‌ ب پشكدارییا 11 یانەیان ب بیت ب شێوەیێ‌ خول دو قۆناغ هاتن و چوون، ئەوا بڕیارە هەڤڕكیێن وەرزێ‌ نوو دێ‌ ل 22ێ‌ ڤێ‌ مەهێ‌ دەستپێكەن.
3- پشتی ب دووماهی هاتنا خولێ‌ ئێك یانە دێ‌ ژ پلا نایاب پاشڤەچیتە پلا ئێكێ‌، خودانا ڕێزا 10ێ‌ دێ‌ یارییەكا پلەی ئۆف دگەل خودانا ڕێزا پلا پێنجێ‌ د خولا پلا ئێك دا كەت.
4- بۆ وەرزێ‌ نوو یا خولا پلا ئێك چار یانەیێن ڕێزێن ئێكێ‌ دێ‌ دەبازبنە پلا نایابا كوردستانێ‌ ئەوا بڕیارە هەڤڕكیێن خولێ‌ ل 15ێ‌ چریا دویێ‌ یا بهێت دەستپێبكەن.
5- هەروەسان د خولا پلا ئێك دا چار یانە دێ‌ پاشڤە چنە پلا دو یا كوردستانێ‌.
6- بۆ وەرزێ‌ نوو یا خولا پلا دو یا كوردستانێ‌ چار یانەیێن ڕێزێن پێشیێ‌ دێ‌ هێنە سەرئێخستن بۆ پلا ئێكا كوردستانێ‌، ئەوا بڕیارە خولا پلا دو ل نەهێ‌ ئادارا سالا بهێت دەستپێبكەت.
7- خولا ل بن 17 سالی دا دێ‌ ب شێوازێ‌ ئێك قۆناغ هێتە بڕێڤە برن، بۆ ڤێ‌ خولێ‌ ئەو یاریزانێن ژ دایكبوویێن 2008 و 2008 بن مافێ‌ پشكداریێ‌ هەیە.
8- هەروەسان بڕیار هاتیە دان بۆ هەر یانەیەكا پشكدار د خولا پلا نایابا كوردستانێ‌ دا پێنچ یاریزانێن پیشەكار دەرڤەیی هەرێمێ‌ ل سەر تیما خوە بۆ وەرزێ‌ نوو زێدەكەت.
9- ئازادكرنا سەرجەمی ئەوان یاریزانێن پێشتر دگەل هەر سێ یانەیێن برایەتی، پیشەسازی و هەلۆ دگەل یانەیێن وان دیسا مافێ‌ دەستبەرداربوونێ‌ وەربگرن و هەر یانەیەكا گرێبەستێ‌ دگەل ئیمزابكەن مافێ‌ وانایە.
10- ل 15ێ‌ ڤێ‌ مەهێ‌ دووماهی موولەتە بۆ ئەوا یانەیێن پشكدار د خولا پلا نایاب و تیمێن ل بن 17 سالی دا كو لیستەیا ناڤێن یاریزانێن خوە بۆ فدراسیۆنێ‌ بهێنە هنارتن.
11- بڕیار هاتە دان وەرزێ‌ نوو یێ‌ خولا فوتسالا كچان ژ پێنجێ‌ كانوونا ئێكێ‌ یا ئەڤ سالە بهێتە پاشئێخستن بۆ 25ێ‌ ئادارا سالا 2026ێ‌.
12- بۆ خولا پلا نایابا كوردستانێ‌ هەتا 8ێ‌ چریا دویێ‌ یا بهێت دووماهی ژڤانێ‌ ڤەگوهاستنێن یاریزانانە و مەرجە هەر یانەیەك پێنج یاریزانێن ژ دایكبوویێن 2007 دناڤ لیستا پێكهاتیێ‌ وان دا بن و ئەڤ پێنچ یاریزانە مافێ‌ هەیی د خولا ل بن 19 سالی ژی دا یاریێ‌ بكەن.
13- دڤێت ناڤێن سێ‌ گۆلپارێزان دناڤ لیستا 22 یاریزانی دا هەبیت دەمێ‌ ئەنجامدانا هەر یارییەكێ‌.
14- هەر یانەیەكێ‌ بەری دەستپێكرنا خولا پلا نایاب خوە ژ خولێ‌ ڤەكێشیت ب كۆژمەیێ‌ 10 ملیۆن دیناران دێ‌ هێتە سزادان و ئێك پلە دێ‌ پاشڤە چیتە پلا ئێك.
15- هەر یانەیەكا پشتی دەستپێكرنا خولا پلا نایاب خوە ژ خولێ‌ ڤەكێشیت دێ‌ ب كۆژمەیێ‌ 40 ملیۆن دیناران هێتە سزادان و پاشڤەچیت بۆ پلا ئێك.
16- هەر یانەیەك د دەمێ‌ ئەنجامدانا یارییا خوە ل یاریگەهێ‌ بەرهەڤ نەبیت ب هەشت ملیۆن دیناران دێ‌ هێتە سزادان، لێ‌ ژبلی هەكە روودانەكا نە خوازراو هەبیت.