هاتيه نووكرن: پێشمه‌رگه‌يى 17 داعش گرتينه و زێده‌ترى 100 كه‌سان كوشتينه
ئه‌ڤرۆ نيوز، نيوار محه‌مه‌د سه‌ليم:
ئه‌ندامێ جڤاتا نوونه‌رێن عيراقێ يێ به‌رێ و ئێك ژ وان كه‌سێن هه‌تا نوكه ماينه ل چيايێ شنگال راگه‌هاند كو نوكه ئاوارێن چيايێ شنگالێ ئه‌وێن ئابلۆقه دايى دشێن بچنه كوردستانێ و رزگاركرنا سنونێ ژى چو نه‌مايه.
مه‌حما خه‌ليل، ئه‌ندامێ جڤاتا نوونه‌رێن عيراقێ، ل سه‌رێ چيايێ شنگال بۆ ئه‌ڤرۆ نيوز گۆت: “نوكه ئه‌و ئاوارێن ل سه‌رێ چيايێ شنگال ماين يێن ئازاد بووين، نه‌ماينه ئابلۆقه‌دايى و دشێن بچنه كوردستانێ”.
زێده‌تر گۆت: “ئه‌ڤه هه‌موو بۆ هه‌لويسێ سه‌رۆك بارزانى و وێ سه‌رپه‌رشتيا وى يا به‌رده‌وام دڤه‌گه‌ريت”.
ئاماژه ب وێ چه‌ندێ ژى كريه كو د ڤان دو رۆژان دا پێشمه‌رگه‌يى جهێن ستراتيژى و گه‌له‌ك گرنگ گرتينه و گۆت: “پلانا ئێك ب تنێ رزگاركرنا سنونێ و ئه‌و ده‌ڤه‌رێن ب سه‌ر ڤه‌يه وه‌كو خانه‌سۆر دكه‌ڤيته لايێ رۆژئاڤا و دوگر و دوگلا و بۆرگه كو به‌رى داعش 170 هزار كه‌س ل ڤان ده‌ڤه‌ران دژيان.
ل دۆر ئامارا ئه‌و گرتى و كوشتيێن كه‌فتينه ده‌ست ئه‌وان، مه‌حما خه‌ليل گۆت: “د ڤان دو رۆژان دا 17 چه‌كدارێن داعش ژ لايێ هێزێن پێشمه‌رگه‌يى ڤه هاتينه ده‌سته‌سه‌ركرن و زێده‌ترى 100 كه‌سان ژى هاتينه كوشتن”.
ئاماژه ب وێ چه‌ندێ ژى كر كو ئه‌وى باوه‌ريى يا هه‌يى پشتى ده‌مه‌كێ كێم ژ ئازادكرنا سنونێ شنگال ژى دێ ئازاد بيت و گۆت: “داعش يا لاواز بوويى، ئه‌وێن ماين ژى هه‌موو خوكوژن و ئه‌و عه‌شيره‌تێن پشته‌ڤانيا داعش ژى دكر يێن ره‌ڤين و چووينه سوريا”.