ب هەلكەفتا 1/6 رۆژا جیهانی یا زارۆیان، چەندین چالاكیێن جودا هاتنە ئەنجامدان و ئەڤ هەلكەفتە هاتە ساخكرن، مەكتەبا رێكخستنا پارتی ل دەڤەرا بەهدینان ژی ب ڤێ‌ هەلكەفتێ‌ برۆسكەكا پیرۆزباهیێ بەلاڤكریە و تێدا هاتیە: ب هەلكەفتنا 1ی حخزیرانێ‌ ڕۆژا جیهانی یا زاڕۆكان، گەرمترین پیرۆزباهیێن خۆ ئاراستەی تەڤایا زاڕۆكێن كوردستانێ و جیهانێ دكەین.
مەكتەبا رێكخستنێ‌ د برۆسكا خۆ دا گۆتژە: «زاڕۆك پاشەڕۆژ و بهایێ هەرە مەزنێ جڤاكێ مەنە، ئەركێ مە یێ سەرەكی یە، ژینگەهەكا ئارام و تژی خۆشی و گرنژین بۆ وان دابین بكەین، هیڤیا ژیانەكا تژی ئاشتی، ساخلەمیەكا باش و پاشەڕۆژەكا گەش بۆ زاڕۆكێن خۆ دخوازین».
دیسا هەر ب هەلكەفتا 1/6 رۆژا جیهانی یا زارۆكان، گۆڤارا سڤۆرە یا زارۆكان یا سەر ب ناڤەندا خانی یا رەوشەنبیری و راگەهاندنێ‌ ڤە، دوهی 1/6/2026 ئاهەنگەكا پڕ چالاكی بۆ زارۆكان ل باجچێن پاركا بارزانی گێڕا.
دیسا هەر ب هەلكەفتا رۆژا جیهانییا زارۆكان، هەژمارەكا چالاكیان بۆ زارۆكێن دەڤەرا ئامێدیێ هاتنە ئەنجامدان، هەروەسا دیاری ژی لسەر هەژمارەكا زارۆكان هاتنە پارڤەكرن.
شەڤگەر رەمەزان، نوونەرێ دەزگەهێ خێرخوازی یێ بارزانی بۆ رۆژناما ئەڤرۆ دیار كر، ب هەلكەفتا رۆژا جیهانییا زارۆكان دەزگەهێ وان هەژمارەكا چالاكیان ئەنجاداینە و گۆت: «هەر ب ڤێ هەلكەفتێ، دەزگەهێ خێرخوازی یێ بارزانی نوونەرایەتیا ئامێدیێ، دیاری لسەر هەژمارەكا زارۆكان ل شێلادزێ پارڤەكرن».
هەر ب ڤێ هەلكەفتێ رێڤەبەریا چاڤدێری و گەشە پێدانا جڤاكی ل ئامێدیێ رابوو ب سازكرنا ئاهەنگەكێ بۆ زارۆكێن سنۆرێ ناوچەدارییا بامەرنێ و كەمپا داوودیێ یا ئاوارەیان.

دهۆك، دلۆڤان ئاكرەیی:

وەزیرا كار و كاروبارێن جڤاكی یا حوكمەتا هەرێما كوردستانێ دیاركر، د دەستپێكا دەست ب كاربوونا ئەڤێ كابینەیێ دا، ب تنێ 11 سەنتەرێن ئۆتیزمێ، كو سێ‌ حكومی و هەشت ئەهلی ل هەرێما كوردستانێ هەبوون، بەلێ نوكە 69 سەنتەر هەنە، 13 ژ وان حكومی نە و 56 ژی ئەهلی نە.
كوێستان مەحەمەد، وەزیرا كار و كاروبارێن جڤاكی بۆ رۆژنامەیا ئەڤرۆ گۆت: «مە رێنومایی راستڤەكرن و كارئاسانی بۆ كەرتێ تایبەت كرینە، دا كو هەڤڕكی پەیداببیت و بها ئەرزان بیت، بەری نوكە بهایێ‌ هەر زارۆكەكی گەهشتبوو هزار دۆلاران، بەلێ نوكە گەلەك ئەرزان بوویە، لیژنەكا بلند بۆ چاڤدێری و هووربینیكرنا خزمەتگوزاریان ل سەنتەرێن ئوتیزمێ‌ هاتیە پێكئینان و چەندین سەنتەر ژی ژ بەر پێگێری نەكرنێ ب رێنوماییان هاتینە گرتن، د نوكە دا هزار و 756 زارۆك د سەنتەران دا خزمەتگوزاریان وەردگرن». گۆت ژی: «ئەگەر د خێزانەكێ دا پتر ژ زارۆكەكێ ئۆتیزم هەبیت، دایك و باب هەردو دشێن مۆلەتێ وەربگرن، هەتا نوكە 569 دایك و بابان مفا ژ ڤێ مۆلەتێ وەرگرتیە». و
وەزیرا كار زێدەتر گۆت: «هەتا نوكە ژ سەرجەمێ‌ سێ‌ هزار و 927 زارۆكێن ئۆتیزم، ب تنێ 310 ژ وان هاریكاریا هەیڤانە وەردگرن، مە پشكنین بۆ هەمی زارۆكێن دی كریە و دۆسیێن 16 هزار كێمئەندامان مە فرێكرینە بەغدا و تیمەكا وەزارەتێ دێ چیتە بەغدا، دا كو د دەمێ گەنگەشەیێن بودجەیا 2026 دا، تەرخانكرنا دارایی بۆ مووچەیێن وان بهێتە كرن».

دهۆك، دلۆڤان ئاكرەیی:

بەرپرسێ پشكا جەماوەری یا لقێ ئێك یێ پارتی ل دهۆكێ دیاركر، بڕیار بوو ماوەیێ ناڤ تۆماركرنێ بۆ پرۆژەیێ شەهیانا ب كۆم ل 5/6/2026 ب دوماهی بهێت، لێ‌ داكو دەلیڤە بۆ هەژمارەكا زێدەتر یا گەنجان ب رەخسیت، دەم هەتا 15/6/2026 هاتیە درێژكرن و ئەڤە دێ بیتە دوماهی ژڤان بۆ وەرگرتنا فایل و بەلگەنامەیان.
یوسڤ سەبری، بەرپرسێ پشكا جەماوەری یا لقێ ئێك بۆ رۆژنامەیا ئەڤرۆ گۆت: «هەتا نوكە نێزیكی 715 كەسان ناڤێن خۆ تۆماركرینە، ژ وان، 46 كەس ژ خێزانێن سەربلندێن شەهیدانە و پشكداریكرنەكا بەرفرەهـ ژ پێكهاتەیێن جودا یێن وەكو: (كوردێن ئێزدی، مەسیحی) و لایەنێن جودا یێن سیاسی تێدا هەنە و مەرج و بەلگەنامەیێن پێدڤی بۆ ناڤ تۆماركرنێ كو كچ و كوڕ بۆ لژنێن ناڤخۆ یێن دەڤەرا خۆ بەرهەڤ بكەن، كەسێ پێشكێش دكەت، دڤێت كارتا زانیاریان یا پارێزگەها دهۆكێ بیت، دڤێت هەڤژینیا ئێكێ بیت و پێدڤی یە رێككەفتنا هەڤژینیێ یا دادگەهێ هەبیت، زێدەباری وێ پەسەندا مختارێ دەڤەرێ بۆ سەلماندنا ئاكنجیبوونێ و ناسنامە و وێنەكێ زاڤای ل گەل بیت».
ناڤهاتی سەبارەت خێزانێن شەهیدان گۆت: «دڤێت سەرەدانا ڕێڤەبەریا گشتی یا شەهیدان بكەن، بۆ وەرگرتنا پەسەندكرنێ، پێدڤیە شەهیدێ سەنگەری بیت، كوڕ، كچ، برا، یان خووشكا شەهیدی ڤەدگریت، پشتی تەمامبوونا دەمێ‌ وەرگرتنا فایلان، دێ لژنە دووڤچوون و پێداچوونێ بۆ ناڤان كەن».
گۆت ژی: «بڕیارە ل 20/6/2026 پرۆسەیا پشككێشانێ ب شێوازەكێ ئازاد و زەلال ب ئامادەبوونا دەزگەهێن ڕاگەهاندنێ، دەزگەهێن یاسایی، كەسایەتیێن ئایینی و مختاران بهێتە ئەنجامدان، هەر لژنەك دێ دیار كەت كا پشكا وێ چەند كەسن».

هەولێر، قائید میرۆ:

سەرۆكێ ئێكەتیا ئینان و هنارتنكاران ل هەرێما كوردستانێ‌ ئاشكرا كر، هەتا نوكە سیستەمێ ئەسیكۆدا ل هەرێما كوردستانێ نەهاتیە بجهئینان و دبێژیت: ژبەر بجه نەئینانا بسیستەمێ ئەسیكۆدا و پێناسەیا نوو یا گومركی بهایێ هندەك كەلوپەلان یێ ئەرزانە.
مستەفا عەبدولڕەحمان، سەرۆكێ ئێكەتیا ئینان و هنارتنكاران بۆ رۆژناما ئەڤرۆ دیاركر، د دەمێ نوكە دا لڤینێن بازرگانی ل گەل وەلاتێن جیهانێ ئاسایی بووینە، ئەو ژی پشتی شەڕ و ئالۆزیێن ئەڤ سالە دەڤەر ڤەگرتی، ب تایبەتی ل گەل كۆمارا ئیسلامی یا ئیرانێ نوكە لڤینێن بازرگانی مینا بەرێ ئاسایی بووینە و گۆت: «بەردەوام كەلوپەل ژ ئیرانێ دگەهنە هەرێما كوردستانێ، ل گەل وەلاتێن دی ژی هەر ئاسایی بوویە و بگرە بەرفرەهتر ژی بوویە».
ل دۆر سیستەمێ ئەسیكۆدا مستەفا عەبدولڕەحمان گۆت: «ل دەستپێكا سالا نوو، حوكمەتا ئیراقێ پێناسەیا گومركی زێدەكریە، ئەو ژی ب رێیا سیستەمێ ئەسیكۆدا، بەلێ هەتا نوكە سیستەمێ ئەسیكۆدا و زێدەكرنا باجا گومركی ژ لایێ هەرێما كوردستانێ ڤە نەچوویە د بیاڤێ بجهئینانێ‌ دا، لەوڕا ژی نوكە بهایێ هندەك كەلوپەلان ل بازاڕێن هەرێما كوردستانێ ژ پارێزگەهێن ناڤەڕاست و باشوورێ ئیراقێ ئەرزانترە».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر، دەست ب پڕۆژەیێ سەخبێریكرنا ڕێكا سەرەكی یا دۆڕیانا سحێلا بۆ گرشینی هاتیە كرن، ئەڤ جادە ب درێژاهیا 20 كیلۆمەتران دێ‌ هێتە سەخبێریكرن.
سەرۆكێ باژێڕڤانیا زاخۆ گۆت: «ڤی پڕۆژەیی گرنگیەكا مەزن و ستراتیژی بۆ دەڤەرێ هەیە، ئەڤ كارە ژ لایێ ڕێڤەبەریا سەخبێریكرنا ڕێك و پران ل ئیدارەیا سەربخوە یا زاخۆ دهێتە ئەنجامدان».
گۆت ژی: «مە پلان هەیە، هەموو جاددەیێن سەرەكی و ناڤخۆیی یێن زیان گەهشتیێ‌ بهێنە سەخبێریكرن، ب مەرەما كێمكرنا ئاستەنگێن هاتنوچوونێ و پاراستنا سلامەتیا وەلاتیان و شۆفێران».