دهۆك، دلۆڤان ئاكرەیی:

سەرۆكێ دەستەیا وەبەرهێنانێ ل هەرێما كوردستانێ دیاركر، هەرێما كوردستانێ كەشەكێ گونجای و ئارام بۆ كارێ وەبەرهێنانێ هەیە و دبێژیت: ئەم ل گەل كۆمپانی و وەبەرهێنەرێن كوێتی د پەیوەندیێ داینە و بڕیارە بهێنە هەرێما كوردستانێ كاریێ‌ وەبەرهێنانێ‌ بكەن و مفای ژ دەلیڤەیێن وەبەرهێنانێ ل هەرێمێ وەربگرن.
د. محەمەد شوكری، سەرۆكێ دەستەیا وەبەرهێنانێ ل هەرێما كوردستانێ بۆ رۆژنامەیا ئەڤرۆ گۆت: «كابینەیا نەهێ یا حوكمەتا هەرێما كوردستانێ گرنگیەكا زۆر ب ئینانا وەبەرهێنەرێن بیانی ددەت، كو بهێن ل هەرێما كوردستانێ كارێ وەبەرهێنانێ بكەن، ل سەر ڕاسپاردەیێن سەرۆكێ حوكمەتا هەرێما كوردستانێ ژی ئاسانكاریێن تەمام بۆ وەبەرهێنەرێن بیانی هاتینە كرن و د نوكە دا كۆمپانی و وەبەرهێنەرێن كوێتی دڤێن مفای ژ دەلیڤەیێن وەبەرهێنانێ ل هەرێما كوردستانێ وەربگرن، پەیوەندیێن مە ل گەل كوێتێ دباشن و مە دڤێت پەیوەندی بەرفرەهتر ببن و بهێن ل هەرێما كوردستانێ د بیاڤێ وەبەرهێنان و بازرگانی و سەرمایەگوزاریێ دا كار بكەن».
گۆتژی: «ل هەرێما كوردستانێ 38 كۆمپانیێن كوێتی هەنە و كارێ بازرگانیێ دكەن، نوكە ژی ئەم د دانوستاندنێ داینە ل گەل وان، كو بهێن ل هەرێما كوردستانێ د بیاڤێ‌ وەبەرهێنانێ دا كار بكەن، ئارمانجا مە ئەوە وەبەرهێنانا بیانی ل هەرێما كوردستانێ زێدەتر ببیت».

هەولێر، قائید میرۆ:

ئەندامەكێ لیژنا نەفت و غازێ ل پەڕلەمانێ ئیراقێ خویاكر، شاندەكێ بلندێ وەزارەتا سامانێن سروشتی و كۆمپانیێن نەفتێ دێ‌ سەرەدانا بەغدایێ‌ كەن و دبێژیت: پێشبینی دهێتە كرن بگەهنە ریككەفتنا دوماهیێ.
دكتۆر سەباح سوبحی، ئەندامێ لیژنا نەفت و غازێ بۆ رۆژناما ئەڤرۆ دیاركر، بڕیارە سوبەهی رۆژا سێشەمبی 2/9/2025 لیژنەكا بلند ژ وەزارەتا سامانێن سروشتی یا هەرێما كوردستانێ و كۆمپانیێن نەفتێ ئەڤێن ل هەرێمێ كار دكەن، سەرەدانا بەغدایێ‌ بكەت و ل گەل وەزارەتا نەفتا ئیراقێ و كۆمپانیا سۆمۆ كۆمببیت و گۆت: «دهێتە چاڤەڕێكرن ڤێجارێ هەرێم و بەغدا ل دۆر پرۆسەیا هنارتنا نەفتا هەرێما كوردستانێ بگەهنە رێككەفتنێ و نەفت بۆ بازاڕێن جیهانێ بهێتە هنارتن».
دكتۆر سەباح سوبحی گۆتژی: «كۆمپانیێن نەفتێ ل هەرێما كوردستانێ داخوازا گەرەنتیێ دكەن بۆ مەزاختنا كرێیا خۆ، لەوڕ اژی دخوازن رێكەفتن ب نڤیسین بهێتە ئیمزاكرن، چونكی هندەك ژ وان كۆمپانیان بەرهەڤ نینن بێی هەبوونا گەرەنتیێ؛ دوبارە دەست ب هنارتنا نەفتێ بكەن، ئەز پێشبینی دكەم كۆمبوونێن ڤێجارێ ئەنجام هەبن و رێككەفتنا دوماهیێ بهێتە ئەنجامدان، ب تایبەتی ژی ل چەند رۆژێن بۆری شاندەكێ كۆمپانیا سۆمۆ سەرەدانا توركیا كربوو، هەموو بەرهەڤی بۆ دەستپێكرنا هنارتنا نەفتا هەرێمێ هاتینە كرن».

رەمەزان زەكەریا:

مەسرور بارزانی، سەرۆكێ حكومەتا هەرێما كوردستانێ بڕیارەك د بەرژوەندیا فەرمانبەرێن زیندانكری و گرتیێن سیاسی دەرئێخست.
فەرمانگەها میدیا و زانیاری ئاشكراكر، مەسرور بارزانی، سەرۆكێ حكومەتا هەرێما كوردستانێ رازیبوو ل سەر كاركرنا وان فەرمانبەرێن زیندانكری و گرتیێن سیاسی هەتا ژیێ 65 سالیێ.
فەرمانگەهامیدیا و زانیاری خویا ژی كریە، بریار هەموو فەرمانبەرێن زیندانكری و گرتیێن سیاسی یێن گەرێن 9 هەتا 15 ژ راژەی ڤەدگریت و مووچەیێ وان ژی ژ بودجەیا وەزارەتێن وان دی هێتە مەزاختن.

ئامێدیێ، مەحمود نهێلی:

ژ بۆ پتر گەهاندنا پڕۆژەیێن خزمەتگوزاری بۆ گوندان و گرنگیدان ب كەرتێ چاندنێ و خزمەتكرنا جۆتیاران د ئەڤ سالە دا حەفت جۆیێن ئاڤدانێ ل سنۆرێ ناوچەدارییا كانی ماسێ هاتینە چێكرن و كەفتینە د خزمەتا جۆتیاران دا.
ئەندازیار بوتان ئامێدی، بەرپرسێ هوبا ئاڤدێریا ئامێدیێ بۆ رۆژناما ئەڤرۆ دیاركر، حكومەتا هەرێما كوردستانێ، ب تایبەتی ژی كابینەیا نەهێ‌ گرنگیەكا زۆر دایە كەرتێ چاندنێ و چێكرنا جۆیان و سكرێن ئاخێ و گۆت: «ل سنۆرێ ناوچەدارییا كانی ماسێ د ئەڤ سالە دا حەفت جۆیێن ئاڤدێریێ هاتینە چێكرن و كەفتیە د خزمەتا جۆتیاران دا».
ئاشكرا ژی كر، جۆیا گوندێن مایێ، چەم سەیدا، بێدهێ‌، كانی ماسێ، دەرگەلا سەیدا، تروانش، ئێك مالێ و مێرگا چیا هاتینە چێكرن و گۆت: «ژ بۆ ئەنجامدانا ڤان جۆیان دۆرێن 900 ملیۆن دیناران هاتبوونە تەرخانكرن».

رەمەزان زەكەریا:

ل سنۆرێ باژێرڤانیا كەلەكچی یا سەر ب دەڤەرداریا شێخان ڤە هەژمارەكا پڕۆژەیان د قووناغا بجهئینانێ دانە.
ئەندازیار تاجدین تەحسین، سەرۆكێ باژێرڤانیا ناوچەداریا كەلەكچی بۆ ئەڤرۆ گۆت: «ل سەنتەرێ ناوچەداریا كەلەكچی هەژمارەكا پڕۆژەیان د قووناغا بجهئینانێ دانە، ژ وانا ژی: ب درێژاهییا 1200مەتران جادەیێن ناڤخۆیی دهێنە دروستكرن و قێركرن ل گەل 1300 مەترێن ئاڤڕێژان، ب تەمامبوونا پڕۆژەیان نێزیكێ 98%ێ رێكێن سەنتەرێ ناوچەداریێ دێ هێنە تەمامكرن و بنە قێر و كەڤنە د خزمەتا وەلاتیان دا».
گۆتژی: «ئەو پڕۆژە ب گوژمێ‌ دو ملیار دیناران ل سەر بودجەیا حكومەتا هەرێما كوردستانێ دێ‌ هێنە بجهئینان، دیسا د پلان دایە جۆتسایدێ 60 مەتری و دەرگەهێ‌ ناوچەداریێ ل گەل پاركەكا مەزن بهێنە چێكرن».

رەمەزان زەكەریا:

ل سنۆرێ باژێرڤانیا ئاكرێ بەرهەڤی دهێنە كرن، بۆ بەلاڤكرنا پارچەیێن ئەردی ل سەر وان پێشمەرگە و فەرمانبەرێن ناڤێن وان د لیستی دا ل باژێرڤانیێ.
باژێرڤانیا ئاكرێ راگەهاند، بەرهەڤی دهێنە كرن ل ڤان نێزیكان پارچەیێن ئەردی ل سەر وان پێشمەرگەیان و فەرمانبەرێن ناڤێن وان ل باژێرڤانیێ بهێنە بەلاڤكرن.
باژێرڤانیا ئاكرێ ئاشكرا ژی كریە، نوكە پتر ژ حەفت هزار ناڤێن مفادار بۆ وەرگرتنا پارچەیێن ئەردی ل باژێرڤانیا ئاكرێ هەنە، 1630 ناڤێن مفاداران گەهشتینە باژێرڤانیێ، بەری نوكە ژی 4548 ناڤ گەهشتبوونە باژێرڤانیێ و 1036 ناڤێن كەڤن ژی ل باژێرڤانیێ مابوون.
باژێرڤانیێ خویاژی كریە، ل گۆر خالان پارچەیێن ئەردی ب قووناغ قووناغ ل سەر پێشمەرگە و فەرمانبەران دێ‌ هێنە بەلاڤكرن.