قەیس وەیس:

چاڤەڕێ‌ دهێتە كرن ئەڤرۆ و سوبەهی ب شێوەیەكێ‌ فەرمی پەردە ل سەر وەرزێ‌ 2026-2027 یا خولا ستێرێن ئیراقێ‌ یا فوتبۆلێ‌ بهێتە دانان ب ئەنجامدانا دەهـ یارییان، ئەوا ل 13ێ‌ ئەیلوونا سالا بۆری دەستپێكری.
دهۆك مێڤانا دیالایە
تیما فوتبۆلا یانەیا دهۆك دێ‌ دووماهی پشكدارییا خوە دا بیتە مێڤانا یانەیا دیالا ئەوا دێ‌ ل دەمژمێر شەشێ‌ ئێڤاری هێتە كرن، ئەلهۆیێن چیا ل ڕێزا 10ێ‌ دهێت ب كۆمكرنا 50 خالان ژ 13 سەركەڤتن، 11 وەكهەڤی و 13 خوسارەتیان، یاریزانێن وێ‌ 44 گۆل تۆماركرین و هەمان هژمارا گۆلان ژی ل سەر هاتیە تۆماركرن، د بەرانبەر دا یانەیا دیالا ل ڕێزا 11ێ‌ دهێت ب كۆمكرنا 46 خالان.
هاریكارێ‌ ڕاهێنەری ب هیڤییە
د كۆنگرەیێ رۆژنامەڤانی یێ‌ بەری یاریێ موهەنەد زێدان هاریكارێ‌ ڕاهێنەرێ‌ دهۆكێ‌ گۆت: راستە خالێن ڤێ‌ یاریێ دبیت چو بوهایێ خوە نەبیت د ڕێزبەندیێ دا لێ‌ بوهایەكێ‌ دیتر هەیە ئەوژی مەعنەویە و دووماهییەكا سەركەڤتنێ‌ یە، یاری بەرانبەر دیالا دناڤ یاریگەها وێ‌ دا ب سانەهی نابیت، خول بدرێژاهییا خوە و ئاستەنگ و ئاریشەیێن خوەڤە كارتیكرن ل سەر گەلەك یانەیان كرییە و تایبەت ل مە ژی كرییە، ب هیڤیینە سێ‌ خالێن مەعنەوی ب دەستڤە بینن و ب كەینە دووماهییەكا سەركەڤتی.
زاخۆ بەرانبەر قارەمانا خولێ‌
ژلایێ‌ خوەڤە یانەیا زاخۆ دێ‌ سوبەهی دەمژمێر 8:30 شەڤ ل یاریگەها ئەلمدینە ل پایتەختێ‌ ئیراقێ‌ بەغدا بیتە مێڤانا یانەیا جەوییە، كوڕێن خابۆری ل ڕێزا نەهێ‌ دهێن ب كۆمكرنا 53 خالان ژ 14 سەركەڤتن، 11 وەكهەڤی و 12 خوسارەتییان، یاریزانێن وێ‌ 47 گۆل تۆماركرینە د بەرانبەر دا 42 گۆل ل سەر هاتینە تۆماركرن، ژلایێ‌ خوەڤە یانەیا جەوییە ئەوا ناسناڤێ‌ خولێ‌ مسۆگەر كری بەری دووماهی هاتنا خولێ‌ ب سێ‌ گەڕان كو دبیتە جارا هەشتێ‌ د دیرۆكا خوە دا، ل ڕێزا ئێكێ‌ دهێت ب كۆمكرنا 86 خالان.
هاریكارێ‌ ڕاهێنەرێ‌ زاخۆ بۆچوونا خوە دیاركر
د پرێس كۆنفرانسێ‌ بەری یارییا واندا نەبیل عەواد هاریكارێ‌ ڕاهێنەرێ‌ زاخۆ گۆت: هەرچەندە یانەیا جەوییە ناسناڤ مسۆگەر كرییە و دێ‌ یارییا وەرگرتنا ناسناڤێ‌ خوە بیت لەوما ژی دێ‌ هەموو بزاڤان كەت دڤێ‌ یاریێ دا ب سەركەڤیت، لەوما ژی یاری بەرانبەر قارەمانا خولێ‌ ب سانەهی نابیت لێ‌ مە بەرهەڤیێن باش كرینە سەرباری هنگاڤتنان و نە پشكدارییا چەند یاریزانێن دی، تیما مە گەلەك ئاستەنگ دەرباز كرن، مەزنترین ئاستەنگا وێ‌ دەمێ‌ پشكداری د كۆپا كەنداڤی و خولا ئیراقێ‌ دا كرین و ئەنجامدانا یارییان بتنێ‌ دناڤبەرا سێ‌ بۆ چار رۆژان بوو و گەشتێن دناڤبەرا ئیراقێ‌، بۆ وەلاتێن كەنداڤی و دیسان باشۆر و ناڤەڕاستا ئیراقێ‌، ئەڤە هەموو كارتیكرنێن نەرێنی بوون.
هەولێر دناڤ ئەرد و جەماوەرێ‌ خوە دایە
ژلایێ خوەڤە تیما یانەیا هەولێر سوبەهی دێ‌ یارییا خوە یا دووماهییا خولێ‌ دناڤ ئەرد و جەماوەرێ‌ خوە دا بەرانبەر ئەمانەت بەغدا ل دەمژمێر شەشێ‌ ئێڤارییا درەنگ ل یاریگەها شەهید فرانسۆ حەریری ئەنجامدەت، كوڕێن كەلهە و منارە ل ڕێزا سێیێ دهێن ب كۆمكرنا 76 خالان ژ 22 سەركەڤتن، 10 وەكهەڤی و پێنج خوسارەتی، هەروەسان پشكدارییا خوە بۆ كۆپا كەنداڤی مسۆگەر كرییە، ژلایێ‌ خوەڤە یانەیا ئەمانەت بەغدا ل ڕێزا 18ێ‌ دهێت ب كۆمكرنا 37 خالان.
نەورۆز مێڤانا نەفتێ‌ یە
ئەڤرۆ ل دەمژمێر شەشێ‌ ئێڤاریا درەنگ یانەیا نەورۆز ژ سلێمانیێ دێ‌ بیتە مێڤانا یانەیا نەفت یا بەغدایی، نەورۆز خودانا 54 خالانە ل ڕێزا هەشتێ‌ دهێت د بەرانبەر دا نەفت 45 خال كۆمكرینە ل ڕێزا 12ێ‌ دهێت.
ژ یاریێن دی یێن ڤێ‌ گەڕێ‌
ئەڤرۆ، مووسل- ئەلقاسم، یاریگەها یانەیا دهۆك دەمژمێر شەشێ‌ ئێڤاری، هەروەسان تەلەبە بەرانبەر كەرخ و زەورا دێ‌ بیتە مێڤانا نەجەف، سوبەهی سێ‌ شەمبی، ئەلغراف بەرانبەر نەفت میسان، ئەلگەرمە مێڤانا كارەبا، شورتە دێ‌ مێڤاندارییا مینا كەت.
هەلوەستێ‌ گشتی بەری ب دووماهی هاتنا خولێ‌
1- جەوییە 86 خال.
2- شورتە 79 خال.
3- هەولێر 76 خال.
4- زەورا 66 خال.
5- تەلەبە 64 خال.
6- ئەلگەرمە 62 خال.
7- كەرخ 59 خال.
8- نەورۆز 54 خال.
9- زاخۆ 53 خال.
10- دهۆك 50 خال.
11- دیالا 46 خال.
12- نەفت 45 خال.
13- ئەلغراف 44 خال.
14- مووسل 44 خال.
15- نەفت میسان 40 خال.
16- مینا 39 خال.
17- كارەبا 38 خال
18- ئەمانەت بەغدا 37 خال.
19- نەجەف 20 خال.
20- ئەلقاسم شەش خال.

رەمەزان زەكەریا:

د داخۆیانیەكێ دا سەرۆكێ یانەیا ئاكرێ یا وەرزشی ئاشكرا كر پشتی دەستكەفت و پێنگاڤێن سەركەفتی یێن تیما وان یا فوتبۆلا د خولا پلا سێ یا ئیراقێ كو بوویە قارەمان و ناسناڤ دەستڤەئینا كارگێریا یانەیێ‌ هزر و پلان بۆ قووناغێن بلندتر و رێزێن باشتر كرینە.
زێدەترمحیەدین تاها بۆ رۆژناما ئەڤرۆ گۆت: سەركەفتنا ئێكەم و دەربازبوونا تیمێ‌ بەر ب خولا پلا دو بوویە پاڵدەرەكێ مەزن بۆ كارگێری و پشتەڤانێن یانەیێ دا كو خەونێن مەزنتر ل دەڤ دروست ببن پلانا مە ئەوە كو بۆ وەرزێ بهێت تیپەكا تۆكمەتر و ب هێزتر ئامادە بكەین بۆ خولا پلە دویا ئیراقێ دا كو ئارمانجا مە یا سەرەكی جێبەجێ ببیت كو ئەو ژی سەركەفتنە بۆ خولا پلە ئێك مە باوەریەكا تەمام ب شیانێن ڕاهێنەرێ‌ خۆ یونس سلێمان هەیە ئەم چ جاران دەستبەرداری وی نابین.
ناڤبری گۆتژی: هەتا نوكە مەرج و ڕێنماییێن فدراسیۆنا فوتبۆلا ئیراقێ‌ ب تەمامی دیار نەبووینە كا دێ ڕێ دەتە ئینانا یاریزانێن پیشەكار بۆ خولێ یان نە لەورا چاڤەڕێی بڕیارێن فەرمی دكەن،پێنەڤێت پشكداریكردنا یانەكێ د هەردو خولێن كوردستان و ئیراقێ دا كارەكێ گەلەك گران و زەحمەتە و ب چو ڕەنگان مرۆڤ نەشێت ب داهاتێ سەربەخۆ یێ یانەیێ هەموو مەزاختن و خەرجییان بڕێڤە ببەت ئەگەر حكومەت و لایەنێن حزبی هاریكار و شتەڤان نەبن مە شیانێن بڕێڤەبرنا تیپێ و بەردەوامبوونێ نابن.
محیەدین تەها ئاماژە ب پرۆژەیێن نوو یێن خزمەتگوزاری د ناڤ یاریگەهێ دا دا و گۆت: د پلانێن مە یێن نێزیك دانە كو سیستەمێ ڕووناهییێ بۆ یاریگەهێ دروست بكەین دا كو بشێین یارییان ل شەڤێ ژی ئەنجام بدەین مە داخازیەكا فەرمی ئاڕاستەی حكومەتێ كریە دا كو جهێ ڕوونشتنا پشتەڤانان ب تەمامی بۆ مە نووژەن و ئاڤا بكەت.

محەمەدعەلی نوری:

بۆ جارا دویێ ل دووڤئێك یانەیا پاریس سانجێرمان یا فرەنسی شیا ناسناڤێ‌ چامپیۆنز لیگ یا قارەمانییا یانەیێن ئۆرۆپا قارەمانێن خولا ب دەستڤە بنیت، پشتی د یارییا فینالێ‌ دا شیایی ب سەركەڤیت ل سەر هەڤڕكا خوە یانەیا ئارسنال یا ئنگلتەرایێ ب لێدانێن پەنەلتییان 4-3 گۆلان ئەوا یاری ب گۆلەكێ‌ ب دووماهی هاتی، ئەڤ قارەمانییە چەند ڕاستیێن سەیر و نهێنێن دیرۆكی یێن جودا هەنە و بڤی شێوەیی.
كاسا ئۆرجینال چو قارەمان نە وەرگرن
پرانییا جەماوەرێن وەرزشی هزردكەن كو ئەو تیما دبیتە قارەمانا چامپیۆنزێ‌ كاسا ئۆرجینال یا راستی دگەل خوە دبەن، لێ‌ د ڕاستی دا فدراسیۆنا فوتبۆلا ئۆرۆپا ل دەفخوە دهێلیت، قارەمان چاپەكا وەكو یا ئۆرجینال وەردگریت، پێشتر دا دەلیڤە بۆ وێ‌ یانەیێ دهاتە دانا ئەوا پێنج قارەمانییا دەستخوەڤەبینیت مافێ‌ هەیی كاسا ئۆرۆجینال دگەل خوە ببەت لێ‌ هەر ژ2009 ئەڤ بڕیارە هاتیە هەلوەشاندن.
سرۆدا قارەمانیێ دیرۆكییە
ئەو سرۆدا بەردەوام بەری هەر یارییەكێ‌ دهێتە ژەنین ئێكەم جار ل سالا 1992ێ‌ بوو كو ژلایێ ئاوازدانەرێ‌ بریتانی تۆنی بریتن ڤە هاتبوو دروستكرن ئەوا ژ پارچەكا ئاوازا كەنیسەیا زادۆك ئەلكاهین یا مۆزیكژەن جۆرج هاندەل هاتییە وەرگرتن كو ب سێ‌ زمانێن ئنگلێزی، فرەنسی و ئەلمانی هاتینە دانان.
ناسناڤ ب یاریزانێن ناڤخۆ
دچەرخێ‌ نوكە دا گرێبەستێن گرانبوها بۆ یاریزانێن دەرڤەیی وەلاتی ئێك ژبەر هەڤڕكی بۆ دەستڤە ئینانا ناسناڤان، لێ‌ دیرۆك بیرا مە دئینن كو یانەیا سێلتیم یا ئسكۆتلەندی ل سالا 1967 شیابوو ب گەنجێن وەلاتێ‌ خوە ناسناڤێ‌ چامپیۆنزێ‌ ب دەستڤەبینیت، هەموو یاریزان نێزیكی باژێری بوو كو مالێن وان بتنێ‌ 48كم دووربوون ژ یاریگەهێ‌.
یانەیەك هیچ خوسارەتی نەدای
قارەمانییا چامپیۆنز یا تژییە ژ وەكهەڤی و خوسارەتییان د قووناغێن دووماهیێ دا، لێ‌ یانەیا بایرن میۆنخ یا ئەلمانی شیابوو ل وەرزێ‌ 2019-2020 ڕیكۆردەكا نوو شكاند كو دبیتە ئێكەم یانە د دیرۆكا چامپیۆنزێ‌ دا هیچ خوسارەتی و وەكهەڤییان نەدەت هەتا بگەهیتە یارییا فینالێ‌ و ناسناڤی ژ ب دەستڤە بنیت.
چامپیۆنز هزرا رۆژنامەڤانەكی بوو
قارەمانییا یانەیێن ئۆرۆپا قارەمانێن خولا چامپیۆنز لیگ هزرا فدراسیۆنا فوتبۆلا ئۆرۆپا نەبوو، بەلكو هزرا رۆژنامەڤانەكێ‌ رۆژنامەیا لیكیب یا فرەنسی گاپریێل هاتوو بوو ل سالا 1954ێ‌، ئەڤچەندە ژی وەكو بەرسڤەكە بۆ رۆژنامەییێن ئنگلتەرایێ كو یانەیا وولفرهامبتۆن هژمارت بوو قارەمانیا ئۆرۆپا و جیهانێ‌ ئەوا دیارییەكا هەڤالینی دا بەرانبەر بۆدابێست یا هنگاری بوو.
ریال مەدرید سەركێشا چامپیۆنزێ‌ یە
تیما یانەیا ڕیال مەدرید 15 جاران ناسناڤ بدەستڤە ئینایە، دووڤدا هەر ئێك ژ ئەی سی میلان حەفت جاران، بایرن میونخ شەش و لیڤەرپۆل شەش، بەرشەلۆنا پێنج، ئەیاكس ئەمستردام چار، مانچستەر یۆنایتد سێ‌، ئینتەر میلان سێ‌ و پاریس سانجێرمان دو ناسناڤ یێن ب دەستڤەئیناین.
گۆلكەرێن دیرۆكی كی نە؟
ل دووڤ لیستەیا فدراسیۆنا فوتبۆلا ئۆرۆپا 10 ئێكەمێن پێشیێ یێن گۆلكەرێن قارەمانییا چامپیۆنزێ‌ بڤی شێوەیی نە.
1- كرێستیانۆ رۆنالدۆ، 141 گۆل،( مان یۆنایتد، ریال مەدرید، پۆڤانتۆس).
2- لیۆنێل مێسی، 129 گۆل،(بەرشەلۆنا، پاریس سانجێرمان).
3- رۆبێرت لیڤاندۆڤێسكی 109 گۆل،(بۆرۆسیا دۆرتمۆند، بایرن میۆنخ، بەرشەلۆنا).
4- كەریم بنزێمە،90 گۆل،( لیۆن- ریال مەدرید).
5- رەوول گۆنزالێز، 71 گۆل،(ڕیال مەدرید- شالكە).
6- كێلینا مباپی،70 گۆل(مۆناكۆ، پاریس سانجێرمان، ریال مەدرید).
7- رۆدڤان نێستلرۆی 56 گۆل،(ئایندهۆڤن، مان یۆنایتد، ریال مەدرید).
8- تۆماس مۆلەر،54 گۆل،(بایرن میۆنخ).
9- تێری هێنری،50 گۆل،(مۆناكۆ، ئارسنال، بەرشەلۆنا).
10- زالاتان ئیبراهیمۆڤێچ،48گۆل( ئەیاكس، یۆڤانتۆس، ئینتەر، بەرشەلۆنا، میلان، پاریس).