ئەلند مزووری

‌خوە هشیارکەن ما نەبەسـە هندە خـەو
باوەربکەن قەت نائێتن ب خەوێ کەو

رێکا ژیـنـێ هـۆ درێـــژە بــێ حـسـاب
خرابـیـیـان نەڤەشــێرن دبـن نیقــاب

بەختەوەریێن لـێ وەریاینە نازە گـول
لێ سارێژکەن تەڤ برینێن ماینە کول

گەر دەستێن ئێکودو بگرین لڤێ ڕێ
ب ئاسـانی دێ دەربــاز بین ژێ پـرێ

کو ژ کاروانـێ جیهانــێ نەڤـەمینین
دڤێت خەبات کەین تم هیڤییان بچینین

نەبێـژن کو دەم چوو بـۆری درەنـگـە
هەر بۆ ژینێ دڤێ بکەین ئەم جەنگە

ژین د خوازە ئـەم بـۆ بکەین کەد و کار
ژێرا ببین خورتێن چەلەنگ چاک سوار

چاڤێ گەل و وەلات هەر تم ل مەیە
دڤێت ژێرا پێشکێش بکەین مژدەیە

مژدەک پاک و پڕ ڕەوان بۆ پاشـەڕۆژ
نەچرمسن کولیلکێن وان هێژ بشکۆژ

کولیلکێن خوە مە ئاڤدانە بخوینا سۆر
بـۆ تـا ئیـرۆ ئارمـانجـا مـە مایــە دۆر

نەهێــژایە ملــەتێ مـــە هـۆ بــــژی
بلا جارەک ئەو ب شـادی بگــڕنــژی

دخوازین دل بەس لێ ببن ئاخ و داخ
هەتـا ئیـرۆ لمــە هاتن گەلـەک شـاخ

بلا جارەک ئەم ژی ل خوە بین خوەدی
دا وەک جاران ل مال و حال نەکین فەدی

شەمال ئاکرەیی

دەلیڤە، وەک هەسپەکێ بێ سەر،
د خۆدیکەکا شکەستی دا دڕەڤیت،
ئەز..
ب پێلاڤێن ژ چەرمێ روی یێن قاییم،
ل پەی دچم.
ل دەوسا شوینەوارێن مە ژ دەست داین
دگەڕیێم.
داکو ب چاڤێ ڤێ تەم و مژێ
ئەوا دوهی دلێن مە بۆ خۆ کریە مەخەل،
دیرۆکێ نەپێڤم.
خۆزی یا من،
د گەریا دەمی دا ئاڤەکا شێلی یە،
ترسا من ئەوە،
وی رەزێ مە ب خوینێ پاراستی،
پێ ئاڤ بدەین و..
چەنگێن بیابانێ،
کویرتر د ئەڤرۆ یا مە دا بچنە خوار.
سەرێن مە، بێ مەی،
بمینن مەست!
تو دزانی..
چما خەونا مە هەر فریکەیە؟
چما هەر چیا دوستێن مەنە؟
چما نەزانین ئەفیۆنا مەیە؟
تە های ژی هەیە..
ئەم ئاڤێ دگەهینینە مێرگێن وان
ئەو ئاگرێ خۆ ب سۆتنا مە خۆش دکەن!
بێهنا مە یا خۆمالی ژ مە دزین
لەو ئەم ئەڤرۆ گولێن ژ پلاستیک و تۆزێینە.
ب ئاگرێ سەربۆرێن دیرۆکێ
ب سەما دکەڤین
لەو ئەز ب سەد تفان
ڤێ دلنەرمییا مە
ئەم کرینە پەیکەرەک ژ خوێ،
نەفرەت دکەم.
ئەم ب ساویلکەیی
“ل گەل هرچی یێن چووینە د جەوالی دا”
دوهی ئەڤی ڕەشەبایێ بیابانێ
ئەم رامالین و..
مە سەرچەمکی گۆڤەندی
بۆ گرت و خۆ پی بادا!
مە نە زانی و هێشتا ژی نزانین
ئەم یێن ل سەر تەختەکێ هەژۆک و
ئەڤ خەوا ب سەرمەدا گرتی
شانۆگەرییەکا “بێکیت” (١) یە.
24 /4 /2026

(١): ساموێل بێکیت (١٩٠٦–١٩٨٩) نڤیسەر، شانۆنڤیس و هەلبەستڤانەکێ ب ناڤوبانگێ ئیرلەندییە. ئێکە ژ کاریگەرترین کەسایەتی یێن ئەدەبی ل سەدەیێ بیستێ و ب سەرکێشێ “شانۆیا بێهۆدەیی Theater of the Absurd” دهیتە دانان. “ل چاڤەڕییا گۆدۆی Waiting for Godot “ ژ دیارترین بەرهەمێن وی یە.

كفاح الزھاوی

پاییز وەكی ماسكەكا خاپینۆك داكەفت، ب رەنگێن خوەیێن زەر جیھانێ دنخێڤت و مرنێ ددێرینتە بەلگان، دار بەھین و مژ ل ھنداڤی باژێری پەنگییا، ھەروەكی سروشتی خوەشییا خوە ژ دەست دای و جلكەك ژ خەمگینییێ ل بەر خوە كری.
ڤەگەرییا فلاتا خوەیا بچووك، ئەوا ئەڤە دەھ سالن تێڤە دژیت، د ناڤ كەلوپەلێن كەڤن و رۆناھییەكا پێتیدا كو خوە ژ پەنجەرەیێ ڤەددزی. رۆناھی ھل نەكر، خوە ھێلا ب ھیڤییا وێ رۆناھییا كزڤە ئەوا ژ جادەیێ دھات، ھەست پێ دكر جھ شكەفتەكا چۆلكرییە و ئەو د ڤەدەرییەكا بێ دووماھیدا دژیت. ل سەر كورسییا خوەیا ھەژھەژۆك روونشت، ب چاڤێن خوەیێن كوور، ژ بیرھاتن و بێئۆمێدییان گران بووین، چاڤدێرییا جادەیێ كر.
ب شەڤ خەونەكا ب سەھم دیت: دێوەكێ درێژ، شوورەك د دەستاندایە، بێدلۆڤانی داران دبڕت، ھەتا باخچە بوویە دەریایەك ژ خوینێ، ب تنێ داربەروویەكێ خوە ل بەر گرت، وی خوە ھلاڤێت دا بپارێزت، بەری ھشیار ببت، یێ بزدیای، د خوھێدا نقۆ بوویی.
بەرێ سپێدێ ل بەر بارانەكا سڤك دەركەفتە سەر جادەیێ، بەر ب باخچەی چوو. ب پێنگاڤێن گران رێڤە دچوو، ھەروەكی ئەرد پێیێن وی دگرت. ل بەرانبەر داربەروویێ روونشت، چاڤدێرییا بەلگێن وێ یێن كێم یێن مایی كر، ھندەك ژ وان نێزیكە بوەرن.
دەمێ بەلگێ داوییێ ھێدی وەریای، ھەست پێ كر كو ژیان ھەمی د وێ چركێدا بچووك دبت: بازنەیەكە رەڤین ژێ نینە د ناڤبەرا بوون و مرنێدا. گۆتە خوە:
– ئەم د قۆناغێن ل دووڤئێكدا دژین، ھەردەم داخوازا ھێشتا دكن، پاشی ل دووماھییێ ھەمی تشتی ژ دەست ددن. ئەڤ بەلگێ بار دكت راستگۆترە ژ ھەمی پەیڤان، ئەو نیشانا ژیانەكا كورت و جوانە. لێ ژ ناڤچووییە.
ھەر ما، ل دارێ و ل بالندەیێن ل ھنداڤ دفڕین تەماشە كر، ھەروەكی ئاوازەكا خەمگین دسترن و ل گەل وەریانا بەلگێ داوییێ، تێ گەھشت كو باركرن قەدەرەكە چو رێ ناچنێ و بیرھاتن ب تنێ د سندۆقا ژبیركرنێدا دمینن.

ژێدەر: https://alantologia.com/blogs/92988/
مالپەرێ: انگولوجیا السرد العربی
* نڤیسەرەكێ عیراقی یە، ل وەلاتێ سوێدێ دژیت

مەسعود کواشی

وێنەیێ تە
هەرشەڤ
تە د ئینیتە
د جیهانا خەیالێن من دا،
دلێ من ژی ژ دلێدانێ
دبیتە دەهۆل و
سینگێ من دکەتە ئاگر…
هەمبێزێن تە
ڕۆندکێن کەل
ب ڕوی یێ من دا، د ئینیتە خوار
د ناڤ نالینێن غەریبییێ دا
ئەز دبمە پەپۆکەکێ ژبیرکری
نە دشێم د خەیالاندا بەردەوام بم
نە من دڤێت بزانم
هەمبێزا تە درەوەکا شرینە و
هەرشەڤ
یا ژ ژییێ من دخۆت
نە ئەز ژ خەیالکرنێ تێر دبم
نە تو جارەکێ دئێی و
ئەڤێ درەوێ
دکەیە راستی؛
و جارەکا دی
من بزڤرینیە ژیانێ.